“Baş məşqçinin gəlişinin hələ bir ayı tamam olmayıb. Ona görə də hansısa böyük dəyişikliklər gözləməyə dəyməz. Komandada hansısa dəyişiklik edilməsi, müəyyən bir sistemin oturuşması üçün vaxt lazımdı. Fəqət komanda sonuncu pillədə, elitanı tərk etmək təhlükəsiylə üzbəüz olduğu üçün bəzi dəyişikliklərin edilməsi labüd idi. Məsələn, Elmar Baxşıyev getməyə üstünlük verdi ki, bəlkə dəyişiklik olar və kluba köməyi dəyər. Hələ ki hadisələrin xeyrimizə inkişaf etmədiyini düşünürəm. Bunun səbəbi əsas rəqibimiz olan “Kəpəz”in yaxşı mübarizə aparması və vacib xallar qazanmasıdı. Ancaq biz də mübarizəni dayandırmaq fikrində deyilik. “Qəbələ” elə komandadı ki, onun aşağı liqaya düşməsinə imkan vermək olmaz. Çünki dövlət tərəfindən yardım alan premyer-liqa klubları arasında infrastruktura və akademiyaya ən çox pul ayıran “Qəbələ”di. Bu üzdən hamımız çalışmalıyıq ki, “Qəbələ” premyer-liqanı tərk etməsin. Yəni “Qəbələ”nin premyer-liqanı tərk etməsi infrastruktura və akademiyaya böyük zərbədi. Bunu biz də, klub da, futbolçular da yaxşı başa düşür, bu üzdən son ana qədər mübarizəmiz davam edəcək. Baxmayaraq ki, aradakı xal fərqi daha da artıb, amma bu sona qədər mübarizə aparmayacağımıza səbəb deyil. Həm də biz ölkə kubokunun yarımfinalındayıq. Orda da mübarizə davam edir. Yəni mövsüm üçün qarşımızda böyük vəzifələr var. Komanda son görüşlərdə yaxşı oyun göstərir. Sadəcə, yaxşı nəticə üçün hər dəfə nəsə çatmır. “Sabah”la oyun yoldaşlıq matçı da olsa, qələbə komandaya psixoloji cəhətdən kömək edə bilər. Futbolçularda özünəinam yaranması çox vacib idi. İnanırıq ki, hadisələr istədiyimiz kimi davam edəcək. İnam da olmasa, bu mübarizəni aparmağa dəyməz”.