Çempionlar Liqasında PSJ ilə cavab görüşünün ilk yarım saatı “Barselona”ya və azarkeşlərinə nağıl kimi gəlirdi.

2 topluq üstünlük, 16 yaşlı Yamalın gözəl keçidi, aylarla özü haqqında tənqidi şərhlər oxuyan Rafinyanın qapıya yol tapması, elə ümumilikdə oyuna nəzarət kataloniyalılara son 5 ildə ilk dəfə bu turnirdə yarımfinala çıxmağı vəd edirdi. Ancaq Arauxonun bir qeyri-dəqiq ötürməsi, Barkolanın bir sıçrayışı, bir “sonuncu ümid folu” və ...nağıl faciəyə çevrildi.

Xavi oyundan sonra hakimin komandasını “öldürməsindən” şikayətləndi:

Xavi bu məqamda haqlıdı ki, Arauxonun meydandan qovulması mübarizənin axarını büsbütün dəyişdi – PSJ qalan bir saat ərzində say üstünlüyündən yararlanmağa borclu idi. Onu da nəzərə alaq ki, “Barsa”nın müdafiə xəttinin mərkəzində 17 yaşlı Kubarsi ilə ehtiyat müdafiəçi Martines oynayırdı, üstəlik Kristensenin cəzalanması üzündən meydanın mərkəzində dağıdıcı futbolçu yox idi. Ancaq uğursuzluğun əsas səbəbi kimi hakimliyi göstərməyə nə Xavinin, nə futbolçuların, nə də kataloniyalı fanatların haqqı var! “Göy-qırmızılar” axmaq səhvlərlə özlərinə qəbir qazdılar.

Arauxonun “qırmızı”sının gerçəkliyinə az adam şübhə edə bilər. Maraq doğuran sual başqadı: niyə təcrübəli müdafiəçi komandası öndə olduğu, Ter Ştegenin isə zərbə bucağını daraltdığı məqamda bu şəkildə qaydanı pozur? Bəlkə də Ronald güman edirdi ki, oyunun hələ 30 dəqiqəsi arxada qalmamış hakim birbaşa qırmızı vərəqə göstərməyə cəsarət etməz. Amma etdi. Lap elə Barkola qol vursaydı da, “Barselona” üçün fəlakət baş verməyəcəkdi – irəlidə hələ xeyli vaxt, ümumi hesabda üstünlük var idi. Bir sözlə, buna haqqı çatmayan futbolçunun ifasında sadə uşaq səhvi “Barsa”nın faciəsinin əsasını qoydu.

Özünü kənarlaşdırma
Lap azlıqda qalandan sonra da, “Barsa”nın vəziyyətdən çıxmaq imkanı var idi, amma zamanında oyunu yeniləsəydi, futbolçular baş məşqçinin göstərişlərinə əməl etsəydi. Ancaq mövsümün ən çətin anında komanda ilə birgə olmaq əvəzinə Xavi özünü təcrid etdi. “Göy-qırmızılar”ın baş məşqçinin meydanın kənarında özünü çox emosional aparması heç kimə sirr deyil. O, “Barselona”nın “sükanı arxasında” olduğu 136 oyun ərzində artıq 3 qırmızı və 22 sarı vərəqə görüb. Ancaq meydanın mərkəzində adi bir qayda pozuntusundan sonra mütəxəssisin psixoz vəziyyətə düşməsinə və reklam lövhəsinə təpik vurmasına heç nə haqq qazandıra bilməz. Belə axmaq hərəkət üzündən baş məşqçisiz qalmaq onsuz da azlıqda oynayan komandanın düşə biləcəyi ən çətin durumlardan biri idi.

Yeri gəlmişkən, oyunun gedişində “Barsa”nın qapıçılar üzrə məşqçisi də ehtiyat oyunçular skamyasından qovuldu, Xavinin qardaşı və yardımçısı Oskar Ernandes isə sarı vərəqə ilə cəzalandırıldı. Hakimin işi ilə bağlı irad bildirmək normal haldı, ancaq məşqçilər korpusu meydanın kənarında özünə nəzarəti itirəndə bu nevroz bütün komandaya ötürülür. Buraxılan ikinci qolu xatırlayaq. Künc zərbəsindən sonra Vitinyanın təhlükəli zonada gözdən qaçırıldığı epizodda məşqçi kənardan futbolçulara xəbərdarlıq etməliydi. Amma məlum səbəbdən belə xəbərdarlıq olmadı.

Daha bir məqam Joao Kanselonun iki kobud səhvidi. Portuqaliyalı ilk yarıda Dembeleni “bağlaya” bilmədi, ikincidə isə cərimə meydançasında məhz ona qarşı axmaqcasına kobud oynadı. Azlıqda qalan komandanın Kanselonu müdafiədə daha etibarlı olan Markos Alonso ilə əvəzləməsinin məqsədəuyğunluğa haqda iddianı bir kənara qoyaq. Bəlkə də bu addım işə yarayardı, bəlkə də yaramazdı. Ancaq bu da reallıqdı ki, “Barsa” oyunun uğursuz axarını dəyişmək üçün heç bir konkret gedişə əl atmadı.

Hətta sonda yenə kataloniyalıların qurtulmaq şansı var idi, ancaq Levandovski zərbə mövqeyinə çıxan oyundaşına ötürmə vermək əvəzinə topu müdafiəçiyə vurdu. Bundan cəmi bir neçə saniyə sonra Robert və komanda yoldaşları 4-cü topu öz qapısında gördü.
Axmaq və əsaslandırılması çətin səhvlərin sırası “Barselona”nı yarımfinalda oynamaqdan məhrum etdi. Nə qədər istəsən, idarəçilikdən gileylənmək olar, amma sağlam düşüncə onu deyir ki, İştvan Kovaçın həm Arauxonu meydandan qovmaq, həm Gündoğana qarşı kobudluğa görə penalti təyin etməmək, həm də Kanselonun Dembeleni yerə sərdiyi epizodda “nöqtə”ni göstərmək üçün bütün əsasları var idi. Xavi bu mövsüm yaxşı çalışıb, ardıcıl 13 məğlubiyyətsiz oyun onun Kataloniyada işini davam etdirməsinin xeyrinə möhkəm dəlildi. Ancaq “Barselona” məhz bu oyunda müstəqil şəkildə tapançanı cibindən çıxararaq gülləni öz ayağına sıxdı. Silahın kiminsə tətiyi basmasından sonra atəş açmasından gileylənmək isə sağlam düşüncəyə müharibə elan etməkdən başqa bir şey deyil!

Bu komandanı irəlidə böyük perspektiv gözləyə bilər və Çempionlar Liqasının 1/4 finalı onun tərəqqisinin ədalətli göstəricisidi. Ancaq Xavi top-səviyyədə məşqçi karyerasını davam etdirmək istəyirsə (“Barselona”da və ya hansısa başqa klubda), nəticə çıxarmalı, günahı başqalarının üzərinə yıxmamalıdı. PSJ-yə gəlincə, Paris klubu yırtıcının yaralı ovunu necə qovmalı olduğunu göstərdi. Daha məqsədyönlü və soyuqqanlı komanda növbəti mərhələyə adladı. Hakimlərin qərarlarını bir kənara qoyub, futbolun ədalətinin məhz bunda olduğunu deməliyik.

Baş məşqçi Xavi futbolçu Xavidən daha çox qovulur
Xavi PSJ ilə oyunda son bir ildə 3-cü dəfə “qırmızı” üzündən “Barselona”nın ehtiyat oyunçular skamyasından qovuldu. O, İspaniya çempionatının “Xetafe” və “Atletiko” ilə oyunlarında da belə sərt şəkildə cəzalanıb. 44 yaşlı mütəxəssis həmçinin 22 dəfə sarı vərəqə ilə “mükafatlandırılıb” (çempionatda 16, ölkə kubokunda 3, Çempionlar Liqasında 2, Avropa Liqasında 1 dəfə).
O da maraqlıdı ki, Xavi “Barselona”nın oyunçusu kimi meydana çıxdığı 767 qarşılaşmada cəmi iki dəfə qovulmuşdu – “Vilyarreal” və “Real” ilə görüşlərdə. Xavi daha bir qırmızı vərəqəni hələ 17 yaşı olanda, “Barsa”nın 2-ci komandasının heyətində İspaniyanın gücünüə görə 3-cü divizionunda çıxış edərkən alıb.

Xavinin karyerasındakı bütün qırmızı vərəqələr
1 2 3 4 5 6
18.01.1998 futbolçu Barselona B İspaniya çempionatı (III) Paxara (s) – 3:3 57
15.12.2001 futbolçu Barselona İspaniya çempionatı Vilyarreal (s) – 1:0 44
08.05.2008 futbolçu Barselona İspaniya çempionatı Real (s) – 1:4 90+2
13.08.2023 baş məşqçi İspaniya çempionatı Xetafe (s) – 0:0 70
17.03.2023 baş məşqçi Barselona İspaniya çempionatı Atletiko (s) – 2:0 42
17.04.2024 baş məşqçi Barselona Çempionlar Liqası PSJ (e) – 1:4 56
1 – tarix, 2 – status, 3 – klub, 4 – turnir, 5 – oyun, 6 - qovulduğu dəqiqə.