“Barselona” çox çək-çevirdən sonra istədiyi oyunçunu sıralarına qata bilib. İspaniya klubu qış “transfer pəncərəsi” zamanı “Los Anceles”dən heyətinə qatdığı Xulian Arauxonun keçidini rəsmiləşdirib.

“Barselona”nın saytının məlumatına görə, 22 yaşlı müdafiəçi ilə müddəti 2026-cı ilin yayınadək nəzərdə tutulan müqavilə imzalanıb. İnsayder Fabritsio Romano transferin bonuslar da daxil olmaqla “Barselona”ya 4 milyon avroya başa gəldiyini xəbər verib.

Xatırladaq ki, meksikalı oyunçu qış “transfer pəncərəsi”nin sonuncu günündə Avropa nəhəngi ilə müqavilə imzalamalıydı. Lakin İspaniya klubu onu qeydiyyatdan keçirmək üçün 18 saniyə gecikmişdi. Bu səbəbdən Arauxonun müqaviləsi baş tutmamışdı. “Barselona” rəhbərliyi yalnız İdman Arbitraj Məhkəməsinə apellyasiya şikayəti verdikdən sonra gənc futbolçunun keçidini rəsmiləşdirib. Xulian cari mövsümün sonunadək kataloniyalıların əvəzedici komandasında oynayacaq.