“Atletik” 40 ildən sonra ölkə kubokunu qazandı - İCMAL
Final oyunu o qədər də parlaq alınmadı.
"Football-plus.az" xəbər verir ki, yalnız hissənin ortalarında komandalar canlandı və bu aralıqda uğur “Malyorka”nın üzünə güldü. Künc zərbəsinin ardından 1-ci zərbəni müdafiəçi, ikincini qapıçı qarşıladı, üçüncü qol oldu. Rodriges topu qapının yuxarı küncünə göndərdi. “Atletik” qol buraxandan sonra ayıldı. Niko Uilyamsın fasilə ərəfəsində vurduğu gözəl qol ofdayd üzündən sayılmadı. O, təkbətək zamanı topu qapının yanından vurmaqla daha bir gözəl imkanı qaçırdı. Oyun canlanandan dərhal sonra nominal qonaqlardan Larin da fərqi artırmaq imkanını əldən verdi. 50-ci dəqiqədə basklar hesabı bərabərləşdirdi. Niko Uilyams incə ötürmə ilə adalıların müdafiəsini yardı, Sanset isə qapıya yol tapdı. Cavabında Muriqi iti bucaq altından zərbə ilə uzaq dirəyin möhkəmliyini “yoxladı”. “Atletik” oyunun qalan bölümündə daha maraqlı təsir bağışadı, qol vəziyyətləri yaratdı. Ancaq əvəzetmələrlə komandasının oyununu canlandıran Agirre mübarizəni əlavə vaxta daşıya bildi. Həmin yarım saat daha ehtiyatlı oyunla yadda qaldı. Penalti seriyasında “Atletik” dəqiq oldu – Raul Qarsiya, Munyain, Vesqa və Berenger zərbəni qola çevirdiyi halda, “Malyorka”nın oyunçuları iki imkanı qaçırdı. Agirresabala Morlanesin zərbəsini qaytardı, Radonyiç heç “çərçivə”yə düşmədi. Beləliklə, “Atletik”in uzunmüddətli titul həsrəti başa çatdı. Tarixində 25-ci dəfə ölkə kubokunu qazanan Bilbao klubu sonuncu dəfə 1984-cü ildə həm bu titulu, həm də çempionluğu əldə etmişdi. Basklar 2020 və 2021-ci illərdə də finala qədər irəliləmiş, uyğun olaraq, “Real Sosyedad”la “Barselona”ya uduzmuşdu.
Yeri gəlmişkən, kubok sayı ilə bağlı mübahisəli məsələyə toxunaq. “Atletik”in “vikipediya”sında bu komandanın 1902-ci ildə də ölkə kubokunu qazandığı göstərilsə də, İspaniya Kral Futbol Federasiyası həmin titulu tanımır.
final
Atletik – Malyorka 1:1, p. – 4:2
Atletik: Agirresabala, De Markos, Vivian, Paredes, Berçiçe (Lekue, 105), De Qalarreta (Qomes, 80), Prados (Vesqa, 46), İ.Uilyams (Berenger, 91), Sanset (Munyain, 91), N.Uilyams, Quruseta (R.Qarsiya, 91).
Malyorka: Qreyf, Qonsales, Valyent (Maffeo, 91), Railyo, Kopete (Nastasiç, 105+3), Lato (Van der Heyden, 111), Darder (Morlanes, 62), Koşta, Rodriges (Radonyiç, 73), Larin (Sançes, 62), Muriqi.
Qollar: Rodriges, 21 (0:1). Sanset, 50 (1:1).
Penalti seriyası: Muriqi – 0:1. R.Qarsiya – 1:1. Morlanes – 1:1 (qapıçı). Munyain – 2:1. Radonyiç – 2:1 (yan). Vesqa – 3:1. Sançes – 3:2. Berenger – 4:2.
Vərəqələr: Paredes, 27. Muriqi, 90+1. Radonyiç, 119 – sarı.
Hakim: Xose Munuera Montero (Andalusiya).
6 aprel. Sevilya. 60000 tamaşaçı.
Reaksiyalar
Ernesto Valverde, “Atletik”in baş məşqçisi:
“Qeyri-adidi, bu titul heç nə ilə müqayisə oluna bilməz, azarkeşlər üçün nə demək olduğu aydındı. Onlar neçə il idi bu uğuru gözləyirdi... Son nəticədə rəqibin az qala mütəxəssis olduğu (“Malyorka” yarımfinalda “Real Sosyedad”ı məhz penalti seriyasında məğlub etmişdi – red.) penaltilərdə qələbə qazandıq. 2-ci hissədə bütün riski göz önünə aldıq. Bərabərlik qolundan sonra irəli atıldıq. İkinci qolu da vura bilərdik, ancaq rəqibin də imkanları var idi”.
Xavyer Agirre, “Malyorka”nın baş məşqçisi:
“Məyusuq, çox arzuolunmaz hisslər yaşayırıq. Hər şey bizim üçün pis bitdi. Çıxışımız püşk atmağa bənzəd – yarımfinalda bəxtimiz gətirdi, bu gün yox. Özümüzü heç nədə qınaya bilmərik. Futbolçulara dedim ki, başlarını uca tutsunlar. Biz ailəyik. Bütün gücümüzü ortaya qoyduq, yaxşı oyun keçirdik”.
Digər xəbərlər
