Fevralın 6-7-də İspaniya kubokunun ilk yarımfinal oyunları keçirildi.

"Football-plus.az" xəbər verir ki, “Real Sosyedad” “Malyorka” ilə ev oyunundakı üstünlüyünü qola çevirə bilmədi. İmanol Alquasilin sülhsevər komandası son 11 gün ərzində 3-cü dəfə rəqibin qol vurmasına imkan vermədi, ancaq özü də fərqlənmədi. Xavyer Agirrenin yetirmələri ilk yarıda yalnız müdafiə haqda düşünmədi, cavab hücumları da qurdu. Pratsın əlverişli mövqedən zərbəsində dəqiqlik çatmadı. İlk yarının sonunda isə basklardan Sadik topu qapının üstündən vurdu. 2-ci hissənin əvvəlində hər iki komanda tempi artırdı və hərəyə bir təhlükəli vəziyyət yaratdı. Adalılardan yenə Prats imkanı qaçırdı, bir dəqiqə sonra Sadik Barreneçanın asmasından yararlana bilmədi. Sadik meydanı tərk edənə qədər daha iki yüzfaizlik imkanı boşa verdi. Balear adalarındakı qolsuz heç-heçə strateji baxımdan “Real Sosyedad”ın maraqlarına uyğundu, hərçənd 2-ci yarıda mübarizənin axarını nəzərə alanda “Malyorka” da ilk oyunun nəticəsindən razı qala bilər. Sadikin çoxlu qol vəziyyətini qaçırmasının 2-ci oyundan sonra San-Sebastyan klubunu “yandıracağını” istisna etmək olmaz.

“Atletik” çoxdan “Atletiko”ya səfərdə qalib gələ bilmirdi. Hətta 10 ildən artıq müddətdə. Ancaq istənilən seriyanın başa çatdığı gün olur. “Atletiko” ev oyununa yaxşı başladı, bəzi imkanlar yaxaladı, ancaq Vitsellə Lino fərqlənə bilmədi. 15-ci dəqiqənin tamamında Qrizmann da şansı qaçırdı. Ardından Mandava penaltiyə səbəbkar oldu - əvvəlcə pis ötürmə verdi. Sonra Pradosu cərimə meydançasında yerə sərdi. Berengerin penaltini dəqiq yerinə yetirməsi ilə irəli çıxan qonaqlar sevimli əks-hücum üslubuna keçmək üçün fürsət tapdı. Someone yetərincə tez dəyişikliklərlə oyunun axarına müdaxilə etməyə çalışdı, “Atletiko” 2-ci hissədə meydanda dominantlıq etdi. Düzdü, qol vəziyyətləri baxımından kəskin fərq yox idi. Linonun bir neçə təhlükəli, amma qeyri-dəqiq zərbəsinə “Atletik” Qomeslə cavab verdi. Amma Oblak həm onun zərbəsini, həm də Vilyalibrenin təkrar zərbəsini dəf etdi. Oblakın həmkarı Agirresabala Qrizmannın iti bucaq altından zərbəsini qaytardı, ancaq sonda o da gücsüz idi – Korreanın zərbəsindən sonra Lekue topu qapı xəttindən çıxardı. Uzatma dəqiqələrində Yeray Moratanı cərimə meydançasında yerə sərsə də, VAR penaltini ləğv etdi. İş ondadı ki, ötürmə anında forvard ofsaydda idi. Minimal üstünlüyü qoruyan “Atletik” bu cütdə favoritə çevrildi. Bilbao klubu yaxşı formada olanda onu evində məğlub etmək heç də asan məsələ deyil.

yarımfinal, ilk oyunlar
Malyorka – Real Sosyedad 0:0
Malyorka: Qreyf, Qonsales, Valyent, Nastasiç, Kopete, Kosta, Rodriges (Sançes, 77), Koşta (Maskarel, 90), Darder (Morlanes, 77), Larin (Radonyiç, 77), Prats (Muriqi, 67).
Real Sosyedad: Remiro, Traore, Subeldiya, Le Norman, Qalan, Subimendi, Mendes, Merino (Turryentes, 90), Kubo, Sadik (Silva, 78), Barreneçea (Maquneselayya, 90).
Atletiko – Atletik 0:1
Berenger, 25-p.
Atletiko: Oblak, Molina (Lyorente, 58), Saviç, Vitsel, Mandava (Ermoso, 46), Lino (Rikelme, 84), Barrios (Korrea, 73), Koke, De Paul, Qrizmann, Depay (Morata, 58).
Atletik: Agirresabala, Lekue, Vivian, Paredes, Berçiçe, De Qalarreta, Prados (Errera, 61), Sanset (Qomes, 53), İ.Uilyams (Vesqa, 85), Berenger (Yeray, 85), Quruseta (Vilyalibre, 53).
Cavab görüşləri fevralın 27-29-da keçiriləcək.

Faktlar
* “Atletiko”nun evdə ölkə kubokunda sonuncu dəfə penaltidən qol buraxmasının üstündən 10 il ötmüşdü. Sonuncu dəfə madridliləri bu yolla Kriştiano Ronaldo məyus etmişdi.
* “Atletik” kubokun cari mövsümündə keçirdiyi 6 oyunda 15 qol vurub ki, bu da 2011/12 mövsümündən bəri Bilbao klubu üçün ən yaxşı nəticədi. Onda basklar 9 oyunda 17 qol vurmuşdu.
* “Atletik” tarxində ikinci dəfə ardıcıl 5 mövsümdə yarımfinalda oynamağa yaxındı. İlk belə seriya 1929-33-cü illər aralığında qeydə alınıb, Bilbao klubu həmin zaman kəsiyində kuboku 4 dəfə (1930, 1931, 1932, 1933) qazanıb.
* “Real Sosyedad” cari mövsümdə bütün turnirləri nəzərə alsaq, 19 oyunda heç-heçə edib ki, bu da “böyük beşlik” ölkələrinin klubları üçün rekorddu (“İnter”lə birgə).

Reaksiya
Dieqo Simeone, “Atletiko”nun baş məşqçisi: “Düşünürəm ki, oyunu ümumilikdə yaxşı keçirdik, ancaq kubok oyunlarında səhv komandaya baha başa gəlir. İlk yarıda yaxşı oynadıq, ikincidə ondan da yaxşı, meydanın rəqibə aid hissəsində çox vaxt keçirdik. Qol imkanlarından yararlana bilmədik, ancaq narahat olmağa dəyməz. Rəqib üstünlük qazandı, cavab görüşünü evdə - azarkeşləri önündə keçirəcək, ancaq biz qələbə üçün mümkün olan hər şeyi edəcəyik. Bu futboldu, hər şey ola bilər”.