Ölkə kubokunun yarımfinal mərhələsinin cavab görüşündə “Malyorka”ya sensasiyalı şəkildə uduzan “Real Sosyedad”ın finala çıxmaq arzusu gözündə qaldı.

"Football-plus.az"xəbər verir ki, adalılar iki oyunu əhatə edən duel boyunca səbrlə şansını gözlədi, zaman-zaman təhlükəli oldu. Cavab görüşünün ilk yarısında basklar oyun vaxtının təxminən 70 faizində topa nəzarət etdi, ancaq onların ərazi üstünlüyü Qreyfin qapısı önündə qol vəziyyətlərinə çevrilmədi. Hər halda, “Real Sosyedad” 45+1-ci dəqiqədə hesabı açmağa çox yaxın idi. Railyonun cərimə meydançasında əllə oynamasına görə təyin olunan penaltini yerinə yetirən Mendes Qreyflə dueldən məğlub ayrıldı. Sözsüz, məhz boşa verilən penalti bu oyunda dönüş anı oldu. Mendes qol vursaydı, “ağ-mavilər” qələbə şansını əldən verməzdi...

2-ci hissənin əvvəlində balearlılar Qonsalesin qarşısıalınmaz baş zərbəsi ilə hesabda irəli çıxdı. 63-cü dəqiqədə meydana çıxan Oyarsabal tezliklə hesabı bərabərləşdirdi. Ardından “Real Sosyedad” bir neçə dəfə qələbə topunu vurmağa yaxın oldu. Ancaq “Malyorka” qapısını toxunulmaz saxlamağı bacardı. Penalti seriyasında Qreyf kapitan Oyarsabalın zərbəsinn öhdəsindən gəldi. Qalan futbolçulardan heç biri büdrəmədi. Bu isə o deməkdi ki, “Malyorka” tarixində 4-cü dəfə ölkə kubokunun finalına çıxdı. “Qırmızı-qaralar” ötən əsrin 90-cı illərində iki finalda uduzub, 2000-lərin əvvəlində isə “Rekreativo”nu darmadağın etməklə bu titulu qazanıb. “Malyorla”nın Sevilyada keçiriləcək final oyununda “Atletik” – “Atletiko” duelinin qalibi ilə qarşılaşacağını da xatırladaq.

yarımfinal, cavab görüşü
Real Sosyedad – Malyorka 1:1, p. – 4:5
Oyarsabal, 71 – Qonsales, 50.
Real Sosyedad: Remiro, Traore, Subeldiya, Le Norman, Qalan (Tirni, 91), Mendes (Turryentes, 79), Subimendi, Merino (Olasaqasti, 104), Zaxaryan (Oyarsabal, 63), Kubo (Sadik, 104), A.Silva (Bekker, 46).
Malyorka: Qreyf, Qonsales, Valyent, Railyo, Kopete, Kosta (Lato, 98), Koşta (Maskarel, 106), Sançes (Morlanes, 72), Rodriges (Darder, 99), Prats (Muriqi, 62), Larin (Radonyiç, 106).
İlk oyun – 0:0.

Atletik” – “Atletiko” oyunu (ilk oyun – 1:0) sabah keçiriləcək.