Srağagün 1-ci liqada pley-offun final qarşılaşması baş tutdu və superliqaya yüksələn son klubun adına aydınlıq gəldi. Xatırladaq ki, 1-ci liqada ilk iki yeri tutan “Samsunspor” ilə “Çaykur Rizəspor” elitaya birbaşa vəsiqə qazanmışdı. Bu il pley-offun şərtləri bir qədər dəyişmişdi.

"Football-plus.az" xəbər verir ki, əvvəlki illərdə 3-6-cı pillələri tutanlar arasında oyunlar keçirilir və qalib müəyyənləşirdi.

Bu il 3-cü pilləni tutan kollektiv birbaşa pley-offun finalında rəqibini gözləyirdi. 4-7-ci pillələrdəkilər isə kimin finala yüksələcəyinə aydınlıq gətirirdi.

3-cü pillənin sahibi “Pendikspor” idi. Digər tərəfdə “Bodrumspor” əvvəlcə “Göztəpə”ni, sonra da Arda Turanın çalışdırdığı “Eyupspor”u mübarizədən kənarlaşdıraraq finala yüksəlmişdi. Həlledici oyun “Akhisar stadionu”nda keçirildi.

Həm “Pendikspor”, həm də “Bodrumspor” daha öncə heç vaxt elitada oynamamışdı. Bodrum təmsilçisi, ümumiyyətlə, 2015-ə qədər daim həvəskarlar liqasında oynayıb. Həmin il 3-cü liqaya, 2017-də 2-ci liqaya, ötən yay 1-ci liqaya yüksələn “Bodrumspor” möcüzəni reallaşdıra bilmədi. “Pendikspor” 2:1 hesabı ilə üstün olaraq tarixində ilk dəfə superliqada oynamaq haqqı qazandı. Pendik İstanbulun qəsəbəsidi. Bu klub məhz İstanbulu təmsil edir.

Maraqlıdı ki, elita ilə vidalaşan Qaradəniz bölgəsi təmsilçisi “Girəsunspor”un yerinə eyni bölgəni təmsil edən “Çaykur Rizəspor”, İstanbulu təmsil edən “Ümraniyəspor”un yerinə isə daha bir İstanbul təmsilçisi “Pendikspor” elitaya yüksəldi. Bu klub Türkiyə çempionatında iştirak edəcək 75-ci, elitada İstanbulu təmsil edəcək 17-ci fərqli kollektiv oldu.

1950-ci ildə qurulan “Pendikspor”un tarixində heç bir ciddi uğur yoxdu. Təkcə bir faktı vurğulayaq ki, bu klub ötən mövsümə qədər hətta 1-ci liqada da heç vaxt oynamamışdı! Yəni pendiklilər ilk cəhddən elitaya yüksəldilər.

Bu uğurun baş memarı Osman Özköylüdü. 51 yaşlı mütəxəssis daha öncə 2012/13-də “Ərciyəsspor”u elitaya daşımışdı. Özköylü “Pendikspor”un başına 2021-in oktyabrında gəlib. Göründüyü kimi, inanılmaz işlər görməyi bacaran məşqçi ilk ilində klubu 1-ci liqaya, 2-ci ilində isə superliqaya daşıdı. “Pendikspor” həm də 3-cü pillə ilə bağlı lənətə son qoydu. Çünki son 7 ildə 1-ci liqanı 3-cü pillədə tamamlayan heç bir klub elitaya vəsiqə qazana bilməmişdi. Sonuncu dəfə bunu 2015/16-da “Alanyaspor” bacarmışdı.

Son illərə qədər “Pendikspor” Türkiyə futbolunda yalnız bir hadisəyə görə tanınırdı. Bu klub 1999-un dekabrında 3-cü liqada oyanayarkən “Fənərbaxça”nı ölkə kubokunda məğlub etməklə populyarlıq qazanmışdı. Həmin məğlubiyyət “Fənər” üçün uzun illər “Pendik faciəsi” kimi qiymətləndirilirdi. Amma sonradan kubokda belə sürpriz nəticələr adi hala çevrildiyindən bu hadisə unudulmağa başlandı. Həm də İstanbul nəhəngi 13 ildən sonra – 2012-nin noyabrında kubokda “Pendikspor”u 1:0 məğlub edərək qisas almağı bacardı.