Bir vaxtlar Türkiyə çempionatında diqqətçəkən nəticələr əldə edən, hazırda isə zonalar üzrə həvəskarlar liqasında mübarizə aparan ''Əskişəhərspor''la bağlı maraqlı xəbər var.

Borclardan və cəzalardan heç cür başı açılmayan kluba sürpriz yardım əli uzadılıb. Ötən mövsüm ''Trabzonspor''a olan borcunu güc-bəla ilə ödəyərək transfer qadağasından qurtulan klubun daha sonra sabiq futbolçusu Mehmet Uçara 1,5 milyon lirə borcu olduğu üzə çıxmışdı. Bu üzdən kluba yenidən transfer cəzası verilmişdi. Amma ''Eyupspor''un prezidenti Murat Özkaya tam təmənnasız şəkildə bu borcu öz üzərinə götürüb. O, Mehmet Uçara öz cibindən 1,5 milyon lirə ödəyib və bununla da ''EsEs''in transfer qadağası yenə aradan götürülüb! Klubdan verilən məlumatda ''Əskişəhərspor'' camiəsi adından Murat Özkayaya minnətdarlıq bildirilib və ''Eyupspor''a superliqaya yüksəlmək yolunda uğurlar arzulanıb.

Arda Turanın çalışdırdığı ''Eyupspor'' hazırda 1-ci liqada inamla turnir cədvəlinə başçılıq edir və elitaya qayıtmağa əsas namizəd sayılır. Türkiyə futbolunun köklü klublarından sayılan, amma maddi problemlər üzündən ildən-ilə geriləyərək həvəskarlar liqasına yuvarlanan ''EsEs'' hazırda öz zonasında birinci pillədədi.

ƏLİ