2-ci yerə iddialıların duelinə azarkeş marağı aşağı səviyyədə idi ki, bunun da səbəbi aydındı.

“Forza Neftçi” boykot xəttindən əl çəkməyib, əvəzində “Sumqayıt”ın fanklubları komandanı dəstəkləməyə gəlmişdi.

Oyun “Neftçi” üçün yaxşı başlamadı. Matçöncəsi isinmə hərəkətləri zamanı zədələnən Lebonu Rəhman Hacıyev əvəzlədi. Artıq 4-cü dəqiqədə qonaqlar Kehatla hesabı açdı. Lakin qol qeydə alınmadı. Roy ötürmə anında oyundankənar vəziyyətdə idi. Meydan sahiblərinin buna cavabı 9-cu dəqiqədə gəldi. Boqomolskinin zərbəsini müdafiəçilər dəf etsə də, top Koffinin qarşısına düşdü. Onun ötürməsini Moreno başla tamamladı. Amma dəqiq ola bilmədi. Çox keçmədən “ağ-qaralar” növbəti dəfə qola yaxın oldu. Ozobiç ara ötürməsi ilə Morenonu qapıçıyla üzbəüz çıxardı. Lakin Brayan dueldən məğlub ayrıldı. Əvəzində “Sumqayıt” hesabı açdı. Muradovun cinah ötürməsini Matias tərs toxunuşla öz qapısına göndərdi – 0:1. Qoldan sonra “Neftçi” irəli atıldı. Boqomolskinin qüvvətli baş zərbəsini Cənnətov dəf etsə də, topu əlindən buraxdı. Onu Bədəlov “sığortaladı”. Ardından Morenonun zərbəsi qeyri-dəqiq oldu. Qarşılığında “Sumqayıt” fərqi iki topa çatdırmağa yaxın oldu. Ninqa qapıçı ilə üz-üzə qalsa da, Cəfərov dueldən qalib ayrıldı.

İkinci yarı, demək olar ki, “Neftçi”nin tam üstünlüyü şəraitində keçdi. 58-ci dəqiqədə Hacıyevin cərimə zərbəsi təhlükəli alındı. Onun qüvvətli zərbəsini Cənnətov küncə çıxardı. Ümidini əks-hücumlara bağlayan qonaqlar 61-ci dəqiqədə oyunun taleyini həll edə bilərdi. Sadəcə, Ninqanın cinah ötürməsindən sonra cərimə meydançasında topa yiyələnən Dosso özünü həvəskar futbolçu kimi apardı, təxminən 10 metrdən “çərçivə”yə düşə bilmədi. 62-ci dəqiqədə Ozobiçin baş zərbəsində azacıq dəqiqlik çatmadı. Əvəzində “Sumqayıt” “Neftçi”ni yenə əks-hücumda yaxaladı. Muradovun 7-8 metrdən zərbəsini Cəfərov dəf etdi. 69-cu dəqiqədə Moreno Mustafayevlə mübarizədə yerdə qaldı. Elçin Məsiyev VAR-la məsləhətləşəndən sonra “nöqtə”ni göstərdi. Topun arxasına Mahmudov keçdi. Cənnətov ilk zərbəni qaytarsa da, kapitan dönən topu qapıdan keçirdi – 1:1. Matçın son dəqiqələri dramatik axarda keçdi. Hətta “Neftçi” ikinci topu da vurmağı bacardı. Lakin referi Şinyaşikinin zərbəsindən öncə qayda pozuntusu qeydə aldı və qolu ləğv etdi. Çox keçmədən “Neftçi”nin təmiz penaltisi verilmədi. Dosso cərimə meydançasında Şinyaşikinin qarşısını kobudluqla kəsdi. Hətta onun topa toxunuşu belə olmadı. Amma Məsiyev nədənsə oyunu davam etdirdi. Bununla da “Neftçi” ikinci pilləni “Zirə”yə təhvil verdi. “Sumqayıt” isə 4-cü pilləyə yuvarlandı.

Gözdən qaçmadı
* “Neftçi Mania” azarkeş qrupu əsas pankartını tərsinə açdı, matçı oturaraq izlədi.
* “Sumqayıt”ın hər iki fan klubu – “Kimyaçılar” və “Sumqayıt Ultras” tribunada yerlərini almışdı.
* “Neftçi”nin Müşahidə Şurasının sədri olacağı ilə bağlı xəbərlər yayılan Xəyal Cəfərov oyunu izləyənlər arasındaydı.
* 73-cü dəqiqədə Məsiyev VAR monitoruna baxarkən “Neftçi”nin futbolçuları Matiasla İsrafilov “Sumqayıt”ın məşçilər korpusu ilə epizodu müzakirə edirdi. Samir Abasov isə Rza Cəfərova öz qapısına tərəf getməli olduğunu bildirdi.
* “Sumqayıt” azarkeşləri oyunboyu Məsiyevdən narazılıq etdi. bildirirdi.
* “Kimyaçılar” oyundan sonra Samir Abasovu səsləyərək, alqışladı. Daha sonra “Neftçi”nin atası Samir Abasov” şüarını səsləndirdilər.