26-cı tur tarixi derbi ilə əlamətdar oldu.

Düzdü, komandaların indiki durumu arasında fərq böyükdü. Lakin ölkənin ən köklü klublarının dueli yenə maraqla gözlənilirdi. 2-ci pillədən uzaq düşən “Neftçi” yenidən liderlər qrupunda dönməyi, “Kəpəz” isə həm “Qəbələ” ilə xal fərqini artırmağı, həm də “Araz-Naxçıvan”a yaxınlaşmağı planlaşdırırdı.

Tovuz stadionuna toplaşanların əksəri gəncəlilərin qələbəsinə ümid edirdi. Azarkeşlər komandalarını emosional şəkildə dəstəkləyirdi. Hətta matçın gedişində AFFA nümayəndəsi Məmmədəli Məmmədovla fanatlar arasında anlaşılmazlıq da baş verdi. “Kəpəz”in azarkeş qrupu “Xəmsə” matçı yerindən izlədisə, “Forza Neftçi” məlum səbəblərdən oyunu boykot etdi. Lakin qonaqlar üçün ayrılmış sektor tam boş qalmadı. Az da olsa, “ağ-qaralar”ın fanatlarına rast gəlmək mümkün idi. Onlar arasında tovuzlular da var idi. Diqqətimi çəkən məqamlardan biri də “Kəpəz”in iki-üç azarkeşinin baş geyimi oldu. Onlar gəncəlilərə dəstəklərini bildirsələr də, papaqlarında “Neftçi”nin rəmzi görünürdü.

Oyun gözlənilən kimi başlamadı. Qonaqların pressinqinə baxmayaraq, “Kəpəz” müdafiəyə “oturmadı”. Gəncəlilər bir neçə dəfə “Neftçi”ni əks-hücumda yaxalamağı da bacardı. 6-cı dəqiqədə Martins mükəmməl zərbə ilə topu “doqquzluğ”a sancdı – 1:0. Qoldan sonra dərhal irəli atılan “ağ-qaralar” 10-cu dəqiqədə təhlükəli hücum qurdu. Emin Mahmudovun zərbəsi qapıdan aralı keçdi. Çox keçmədən “Kəpəz” “Neftçi”ni yenidən əks-hücumda yaxaladı. Kvirkviyanın uzaq məsafədən zərbəsini Rza küncə çıxardı. 29-cu dəqiqədə Boqomolski bir neçə rəqibi geridə qoyaraq, qapını nişan alsa da, qolkiper yerində idi. Qonaqlar qol istəyinə 32-ci dəqiqədə çatdı. Mahmudovun ötürməsini Ozobiç başla tamamladı – 1:1. Hissənin sonluğunda Lebonun qüvvətli zərbəsini qapıçı çətinliklə dəf etdi.

İkinci yarıya meydan sahibləri fəal başladı. İlk dəqiqələrdə Yunanovun zərbəsi təhlükəli alındı. Lakin Rza yerində idi. Həmin hücumun davamında “Kəpəz” yenidən hesabda önə keçdi. Şahverdiyevin ötürməsindən sonra Əlicanov adını tabloya yazdırdı. Qonaqlar fəallığı artırıb, hesabı bərabərləşdirməyi bacardı. Qapı önündə yaranan qarışıqlıqdan istifadə edən Ozobiç dublunu rəsmiləşdirdi. 62-ci dəqiqədə meydan sahibləri yenidən önə çıxdı. Çoxgedişli kombinasiyanı bitirən Martins baxımlı qola imza atdı. 73-cü dəqiqədə mübahisəli hadisə baş verdi. Xvalkonunu Mahmudova qarşı kobudluğunu baş hakim sarı vərəqə və penalti kimi qiymətləndirdi. Nəticədə Ozobiç hetr-trik müəllifi oldu. Son dəqiqələrdə “Neftçi” hesabda önə çıxmağa yaxın idi. Lakin Boqomolskinin baş zərbəsindən sonra top tirdən döndü.

Bununla da “Neftçi”dən 1 xal qoparan “Kəpəz” “Qəbələ” ilə xal fərqini 12-yə çatdırdı.

Gözdən qaçmadı
* “Neftçimania” azarkeş qrupu da Tovuzda görünmədi.
* Tribunaların 80 faizi “Kəpəz”ə azarkeşlik edirdi.
* AFFA nümayəndəsi Məmmədəli Məmmədovla azarkeşlər arasında qarşıdurma baş verdi.

İSMAYIL XEYRULLAYEV