Turnir cədvəlində qonşu pillələrdə qərarlaşan komandalar Bayılda üz-üzə gəldi. Oyuna müəyyən azarkeş marağı da var idi, tribunaların üçdəbiri dolmuşdu. Meydan sahiblərini “Dənizçilər” dəstəkləyirdisə, “Turan Ultras” da qonaq tribunasında öz yerini almışdı. Tərəflər matçboyu susmadı, komandalarını irəli dəstəklədilər.

Oyun qarşılıqlı hücumlarla başladı. İlk dəqiqələrdə meydan sahibləri hesabı açsa da, qol qeydə alınmadı. Quetanın ötürməsində Abdullazadə topu qapıdan keçirdi. Lakin VAR-ın qərarı ilə oyundankənar vəziyyət qeydə alındı. Qonaqların buna cavabı gecikmədi. 11-ci dəqiqədə Nəcəfovun uzaq məsafədən baxımlı zərbəsini Ağayev küncə çıxardı. Çox keçmədən “Səbail” təhlükəli hücum qurdu. Ramalinqomun ötürməsini Nəbiyev zərbə ilə tamamladı. Amma dəqiq ola bilmədi. Buna baxmayaraq, epizodun davamında tovuzlular müdafiədən çıxa bilmədi. Vəziyyətdən yararlanan “dənizçilər” hesabı açdı. Ramalinqomun ötürməsi zamanı Almeydaya toxunan top Nunonun qarşısına düşdü. O, topu saxlamadan birbaşa qapıya göndərdi – 1:0. Hissənin sonları qonaqların üstünlüyü ilə müşayiət olundu. 45-ci dəqiqədə Zülfüqarlının cinah asmasını Paçu başla qapıya göndərdi. Lakin Səlahət inamlı oynadı. Çox keçmədən qolkiper penaltiyə səbəb oldu. O, Souzanın qarşısını kobudluqla aldı. Topun arxasına Nəbiyev keçdi. Onun zərbəsi qarşısıalınmaz oldu – 1:1.

İkinci yarı nisbətən sönük keçdi. Demək olar ki, qol vəziyyətləri qeydə alınmadı. Bunların birində künc zərbəsindən sonra top Hakmanın önünə düşdü. Lakin müdafiəçi qapıya dəqiq zərbə endirə bilmədi. 86-cı dəqiqədə Nəcəfovun fəallığı özünü göstərdi. O, bir neçə rəqibini geridə qoyub, qapı qarşısına ötürmə verdi. Lakin burda nə Quseynov, nə də Serrano dəqiq ola bildi. Əvəzində meydan sahibləri qola yaxın oldu. Kornerdən sonra Nəbiyevin zərbəsi təhlükəli alındı. Onun fərqlənməsinə qolkiper mane oldu. Oyunun son dəqiqələrində Almeyda baxımlı hərəkətlərlə bir neçə rəqibini geridə qoydu. O, Abdullayevi zərbə mövqeyinə də çıxardı. Lakin hücumçu dəqiq ola bilmədi. Nəticədə tərəflərin səylərinə baxmayaraq, Bayılda qollu heç-heçə qeydə alındı – 1:1. Bununla da hesabına 1 xal yazan komandalar turnir cədvəlində yerində saydı. “Səbail” son üç turda qələbəyə həsrət qalıb.

Gözdən qaçmadı
* Oyun “31 mart – azərbaycanlıların soyqırımı günü” ilə bağlı nitqlə başladı.
* Oyunu izləyənlər arasında AFFA İcraiyyə Komitəsinin üzvü İsgəndər Cavadov da var idi.
* “Turan Tovuz”un baş məşqçisi Ayxan Abbasov hakimlikdən kəskin narazılıq edirdi. O, artıq 8-ci dəqiqədə “qardaşımsız, normal hakimlik edin”, - deyə 4-cü hakimə irad bildirdi.
* 77-ci dəqiqədə Abbasov Pusini meydana buraxmaq üçün yanına çağırdı. Hətta hücumçu dördüncü hakimin yanında referinin qərarını gözləyirdi. Lakin baş məşqçi sonradan fikrindən daşındı və onu meydana buraxmadı.
* Epizodların birində Xəyal Nəcəfov cərimə zərbəsi tələb etsə də, Həmzəzadə matçı davam etdirdi. Hücumun davamında Şahin Diniyev yarımmüdafiəçiyə simulyasiya etdiyini bildirdi.
* 82-ci dəqiqədə “Turan Tovuz”un ehtiyat oyunçuları və məşqçi korpusu hakimə kəskin etiraz etdi. Rəvan Həmzəzadə isə skamyaya yaxınlaşaraq “bu reaksiya kiminsə buranı tərk etməsinə səbəb olacaq”, - dedi.

İSMAYIL XEYRULLAYEV