Kilian Mbappenin növbəti mövsümdən “Real”da oynayacağına artıq heç bir şübhə qalmayıb.

“Football-plus.az” xəbər verir ki, bunu “Marca”nın son xəbərindən sonra əminliklə demək olar.

Hücumçunun PSJ ilə müqaviləsi iyunun 30-da qüvvədən düşəcək. Rəhbərliyin yeni təklifini hələ bir neçə ay əvvəl rədd edən Kilianın gələn mövsümdən “Real”da çıxış edəcəyi dəqiqləşib. İspaniyanın populyar idman nəşrinin məlumatına görə, Mbappe hələ fevral ayında Madrid klubu ilə 5 illik müqavilə imzalayıb.

Bu mövsüm PSJ-də 39 oyuna 39 qol vurub 8 məhsuldar ötürmə edən fransalı futbolçu ilə bağlı digər maraqlı xəbəri “football-espana” saytı yayıb. Bu mənbəyə görə, “Real” rəhbərliyi Kiliana keçidi ilə bağlı açıqlama verəcəyi tarixi seçmək imkanı da yaradacaq. Yeri gəlmişkən, dünya çempionu bir neçə gün əvvəl gələcək karyerası ilə bağlı məsələyə Avropa çempionatı ərəfəsində aydınlıq gələcəyini bildirib.

Yeri gəlmişkən, PSJ Vinisius Juniora görə “Real”a 200 milyon avro ödəməyə hazırdı. Məlumatı yayan “El Debate” nəşri 23 yaşlı braziliyalı vingerin Mbappe ilə eyni mövqedə oynamasının sual altında olduğunu vurğulayır. Bir müddət əvvəl Vinisiusun Kilianın Madridə gəlmsinin əleyhinə olduğu, onun bu halda klubunu dəyişmək istəyini rəhbərliyə bildirdiyi iddia edilmişdi.