Mərakeşin müvafiq qurumları dünya çempionatına hazırlıq işlərinə start verib.

Bu ölkə yaxın gələcəkdə dünyanın ən böyük stadionuna malik olacaq.

2030-cu ildə dünya çempionatı ilk dəfə 3 qitədə və 6 ölkədə keçiriləcək. Matçların çoxu Mərakeş, İspaniya və Portuqaliyada keçiriləcək. Yalnız 3 oyun Cənubi Amerikada baş tutacaq. Digər təşkilatçılar açılış oyununu qəbul edəcək Uruqvay, Argentina və Paraqvay olacaq. Artıq Mərakeş dünya çempionatı üçün inşası planlaşdırılan yeni stadionun layihəsini təqdim edib. Arena “Grand Stade de Casablanca” adlanacaq. Stadionun tribunaları 115 min tamaşaçı tutumuna malik olacaq ki, bu da dünyanın ən böyük futbol arenası sayılacaq. İdman qurğusu Əl-Mənsuriyyə şəhərində tikiləcək.

Bir maraqlı məqam da var. Mərakeşlilər nəhəng stadionu tikməklə İspaniya və Portuqaliya ilə birlikdə evsahibliyi edəcəkləri dünya çempionatının finalını da təşkil etmək hüququ əldə etmək istəyirlər. Lakin “The Sun” qəzetinin yazdığına görə, İspaniyanın hakim dairələri finalın Madrid və ya Barselonada keçiriləcəyinə ümid edir. Hələ ki, bu məsələyə tam aydınlıq gəlməyib.