Cənubi amerikalılar da DÇ-2030-a iddia edəcəklər
DÇ-2030-a iddia edəcək ölkələrin sayı artıb.
Bu, Uruqvayın paytaxtı Montevideoda keçirilən tədbirdə məlum olub.
Xatırladaq ki, bir neçə gün əvvəl Uruqvay Futbol Assosiasiyasının (UFA) rəsmi “tvitter” səhifəsində yerləşdirilən məlumatda UFA-nın 8 ildən sonrakı dünya çempionatına ev sahibliyi etmək istədiyi bildirilmişdi. Lakin Uruqvay nəhəng turniri Argentina, Çili və Paraqvayla birlikdə təşkil etməyi planlaşdırır. 4 ölkənin şərikli namizədliyi rəsmən avqustun 2-də irəli sürülüb. Bunun üçün təşkil olunan mərasim məşhur “Sentenario” stadionunda baş tutub. Tədbirdə iştirak edən Cənubi Amerika Futbol Konfederasiyasının prezidenti Alexandro Dominges çıxışı zamanı belə deyib: “Biz tarixin başladığı məkandayıq. Bu layihə yalnız hökumətlərin deyil, bütün regionun istəyidi. Başqa dünya çempionatları da olacaq, lakin mundialın 100 illiyi yalnız bir dəfə qeyd olunacaq”.
2030-cu il yalnız Uruqvay deyil, həm də dünya futbolu üçün əlamətdar tarix olacaq. Çünki həmin il ilk dünya birinciliyindən bir əsr ötmüş olacaq. Xatırladaq ki, Uruqvayda baş tutan DÇ-1930 təşkilatçı ölkənin komandasının qələbəsi ilə başa çatıb. Maraq üçün DÇ-1962-nin Çilidə, DÇ-1978-in isə Argentina keçirildiyini də yada salaq. Paraqvay isə indiyədən belə böyük turnirə ev sahibliyi etməyib.
Cənubi Amerikanın 4 ölkəsi 8 ildən sonrakı mundialın təşkilatçılıq hüququ uğrunda mübarizədə rəqibsiz qalmayacaq. Çünki ötən il İspaniya və Portuqaliyanın da DÇ-2030-a iddia edəcəyi rəsmən açıqlanmışdı.
