Gözlənildiyi kimi, Ukrayna DÇ-2030-a evsahibliyi etmək hüququnu itirib. Bu məsələyə martın 14-də aydınlıq gəlib.

"Football-plus.az" xəbər verir ki, ölkədə Rusiya ilə müharibə davam etdiyinə görə Ukraynanın 7 ildən sonra dünya çempionatının oyunlarını təşkil edə biləcəyi ehtimalı minimuma enmişdi. Son vaxtlar Ukrayna Futbol Assosiasiyasının (UFA) rəhbərliyində bu baxımdan qeyri-müəyyənlik hökm sürürdü. Müharibədən başqa problem də vardı. UFA-nın prezidenti Andrey Pavelko ötən ilin noyabrda vəsaitlərin mənimsənilməsində şübhəli bilinərək həbs edilmişdi. Bu ilin fevralında məhkəmə onu bir ay müddətinə vəzifəsindən kənarlaşdırmışdı.

Ukraynanın DÇ-2030-a evsahibliyi üçün namizədliyi 2022-ci il oktyabrın 5-də İspaniya və Portuqaliyanın futbol qurumları tərəfindən irəli sürülmüşdü. Lakin məlum səbəblərdən bu ölkəni şərikli layihədə Mərakeş əvəzləyib. Bunu Afrika Futbol Konfederasiyasının idarə heyətinin son iclasında Mərakeşin idman naziri Çakib Benmussa bəyan edib.

Qeyd edək ki, DÇ-2030-un təşkilatçılığı uğrunda Uruqvay, Argentina, Çili, Paraqvay, həmçinin Səudiyyə Ərəbistanı, Misir və Yunanıstandan ibarət daha iki şərikli ölkələr qrupu mübarizə aparacaq. Təşkilatçı FİFA-nın 2024-cü ildə keçiriləcək 74-cü konqresində seçiləcək.