FİFA 3 qitəni və 6 ölkəni birləşdirdi! - TƏHLİL
Nəhayət, 2030-cu ilə təyin olunan dünya çempionatının təşkilatçısı ilə bağlı suala cavab tapılıb. Mundialın hansı regionda – Cənubi Amerikada, yoxsa Avropa və Afrikada (şərikli) keçiriləcəyi sual doğururdu. Hər üç qitədə futbolun daha çox inkişaf etdiyi iddiaçılar vardı. Maraqlıdı ki, FİFA çətin vəziyyətdən çıxış yolunu qeyri-adi şəkildə tapıb.
"Football-plus.az" xəbər verir ki, DÇ-2030 birdən-birə 3 qitədə və 6 ölkədə keçiriləcək! Bu barədə FİFA-nın mətbuat xidməti məlumat yayıb. Təşkilatın Şurasının son iclasında nəhəng turnirin oyunlarının evsahibliyi etmək üçün FİFA-ya rəsmən müraciət edən bütün ölkələrdə keçirilməsi qərara alınıb. Beləliklə, təxminən 7 ildən sonrakı mundial Uruqvay, Argentina, Paraqvay, Mərakeş, İspaniya və Portuqaliyada təşkil ediləcək.
Əksər oyunlar Mərakeş, İspaniya və Portuqaliyada oynanılacaq. Maraqlıdı ki, Cənubi Amerikada yalnız üç matç keçiriləcək. Mundialın açılış matçı yarışın 100 illiyi ilə əlaqədar Uruqvayda təşkil ediləcək. Xatırladaq ki, ilk dünya birinciliyinə bu ölkə evsahibliyi edib. Finalda Argentinaya qalib gələn Uruqvay yığması ilk çempion kimi tarixə düşüb. Məsələnin ikinci qeyri-adi tərəfi birdən-birə üç açılış matçının təşkil ediləcəyi ilə bağlıdı. Argentina və Paraqvayda keçiriləcək oyunların iştirakçılarından biri bu ölkələrin komandası olacaq. Amma bu da var ki, Cənubi Amerikanın təşkilatçı ölkələrinin komandaları turnirə birbaşa vəsiqə ilə təmin olunmayacaq. Başqa sözlə, Uruqvay, Argentina və Paraqvay yığmaları regionun digər komandaları kimi seçmə oyunlarda iştirak edəcəklər. İlkin plana əsasən, DÇ-2030-un finalına “Real”ın ev oyunlarını keçirdiyi “Santyaqo Bernabeu” stadionu səhnə olacaq.
Artıq oyunların necə paylanacağı da məlum olub. Doğrudu, bu, rəsmi məlumat deyil. Bu barədə COPE məlumat yayıb. İlk 3 matçın Cənubi Amerikada - Uruqvay, Argentina və Paraqvayda olacağını bildirdik. Radiostansiyanın jurnalisti İsaak Futonun bildirdiyinə görə, turnirin oyunları İspaniyada 11, Portuqaliyada 3, Mərakeşdə isə yalnız 1 stadionda keçiriləcək. İspaniyada dünya çempionatının oyunlarının Madriddəki “Santyaqo Bernabeu” və “Metropolitano”, Barselonadakı “Kamp Nou” və Sevilyadakı “La Kartuxa” stadionlarında keçiriləcəyi dəqiqdi. COPE-nin məlumatına inansaq, Mərakeş Futbol Federasiyası (MFF) bu bölgüdən narazı qalıb və FİFA-dan daha çox oyunun təşkilini istəyib. MFF əvvəlcədən FİFA-ya Mərrakeş, Rabat, Aqadir, Kasablanka, Tanjer və Fes şəhərlərindəki 6 stadion təklif edib. Maraqlıdı ki, qurumun rəhbərliyi hətta sifariş ərizəsində final matçının Kasablankada təşkilinə hazır olduğunu da qeyd edib. Bu istək baş tutmayacağı halda isə yarımfinal oyunlarından birinin Mərakeşdə keçirilməsini təklif edib. Bunu jurnalistlərə MFF-nin prezidenti Fauzi Kekya açıqlayıb.
Cənubi Amerika Futbol Konfederasiyasının prezidenti Alexandro Dominges FİFA-nın qərarına “X” sosial şəbəkəsi vasitəsilə belə münasibət bildirib:
“Buna inanırdıq. 2030-cu ildə keçiriləcək mundial ilk dəfə təşkil olunduğu məkanda başlayacaq. Uruqvay, Argentina və Paraqvay yubiley çempionatının açılış matçlarını qəbul edəcək”.
Maraqlıdı, FİFA-nın prezidenti belə seçimi necə izah edir? Canni İnfantino dünya çempionatının 3 qitədə və 6 ölkədə keçirilməsi ilə bağlı qərarı belə şərh edib:
“FİFA və futbol bölünmüş dünyada birləşir. Bütün dünya futbolunu təmsil edən FİFA Şurası ilk dəfə 1930-cu ildə Uruqvayda təşkil edilən dünya çempionatının 100 illiyini ən layiqli şəkildə bayram etməyə yekdilliklə səs verib. Bu münasibətlə böyük turnir Cənubi Amerikada start götürəcək. Uruqvay, Argentina və Paraqvay yubiley çempionatının açılış matçlarını təşkil edəcək. Bu matçlardan birincisi, əlbəttə ki, mundialın ilk oyununun keçirildiyi Montevideodakı əfsanəvi “Sentenario” stadionunda oynanılacaq. FİFA Şurası həmçinin dünya çempionatının qalan matçlarının təşkilatçı olan Mərakeş, İspaniya və Portuqaliyada keçirilməsinə yekdilliklə razılaşıb. Afrika və Avropa qitələri yalnız futbol bayramı üçün deyil, həm də unikal sosial və mədəni birlik naminə birləşib. Sülh, təmkinlik və inklüzivlik üçün necə gözəl aksiyadı... 2030-cu ildə unikal qlobal tədbir keçiriləcək: üç qitə - Cənubi Amerika, Avropa, Afrika və 6 ölkə - Uruqvay, Argentina, Paraqvay, Mərakeş, İspaniya və Portuqaliya mundialın 100 illiyini birgə qeyd etməklə dünyanı salamlayacaq və birləşdirəcək”.
Digər xəbərlər
