Qalmaqallı “Trabzonspor” – “Fənərbaxça” oyunu ilə bağlı Türkiyə Futbol Federasiyasının nəzdində fəaliyyət göstərən Nizam-İntizam Komitəsinə edilən sövqləri açıqlamışdıq.

"Football-plus.az" xəbər verir ki,dünən isə cəzalar bəlli olub. Beləliklə, “Trabzonspor”un stadionuna 6 oyunluq cəza verilib. Qaradənizlilər superliqada növbəti 6 ev oyununu azarkeşsiz keçirməli olacaq. “Bordo-mavililər”in bu mövsümün sonuna qədər cəmi 4 ev oyunu qaldığını nəzərə alsaq, komanda cəzasını gələn mövsümün əvvəlində də çəkməkdə davam edəcək. Trabzonluların baş məşqçisi Abdulla Avcının köməkçisi Egemən Korkmaza 1 oyunluq cəza verilib. “Fənər”lilərə gəlincə, Ceyden Oostervolde ilə qapıçı İrfan Can Eğribayata 1 oyunluq cəza verilibsə, Brayt Osayi-Samuelə heç bir cəza verilməyib. Klubun işçilərindən Kürşat Çiftlik 15, Okan Özkan isə 12 günlüyə vəzifəsini icra etməkdən məhrum edilib. Cəza alan futbolçuların dünən “Adana Dəmirspor”a qarşı matçda forma geyib-geyməməsi Apellyasiya Komitəsinin dünənki toplantısında bəlli olmalı idi. Belə ki, “Fənər” cəzaların ləğvi üçün şikayət edib. Elə “Trabzonspor” cəbhəsi də narazıdı. Klubun sosial şəbəkədəki hesablarında “Ədalətiniz batsın! Qalxın qoltuqlarınızdan, istefa verin” paylaşımı edildi. Qaradənizlilərin rəhbərliyi 6 oyunluq cəzanın endirilməsinə çalışacaq.