Məlum olduğu kimi, Türkiyə klubları bu mövsüm artıq avrokuboklarda çıxışlarını başa vurublar. Bu arada srağagün UEFA-nın Nizam-İntizam Komitəsi (NİK) Türkiyə klubları ilə bağlı cəzaları açıqlayıb.

"Football-plus.az" xəbər verir ki, “Trabzonspor”a Konfrans Liqasının pley-offunda “Bazel”lə səfər oyununda fanatların tribunada petard yandırması və meydana yad cisimlər atması üzündən 20 min avro cəza verilib.

“Fənərbaxça” isə Avropa Liqasının 1/8 finalında “Sevilya” ilə cavab oyununda həm fanatların meydana yad cisimlər atması, həm də “Ülkər” stadionunda tribunalar arasındakı keçidlərin bağlanması üzündən 44 min avro cəza alıb. Bundan başqa, “sarı-lacivərdlilər”ə avrokuboklardakı növbəti ev oyununda 5 min oturacağa bilet satmaq qadağası qoyulub. “Sivasspor”un cəzası isə gözlənildiyi kimi, daha ağır olub.

Sivaslıların KL-in 1/8 finalının “Fiorentina”ya qarşı evdəki cavab oyununda böyük bir qalmaqal yaşanmışdı. Görüşün sonlarına yaxın iki fanat meydana çıxmış və onlardan biri qonaqların üzvü Alessandro Byankonun üzünə zərbə endirmişdi. Nəticədə 20 yaşlı yarımmüdafiəçinin burnu qırılmış, hər iki azarkeş isə həbs olunmuşdu. Bu hadisə üzündən “yiğidolar” avrokuboklarda bir sonrakı ev oyununu boş tribunalar önündə keçirməli olacaq!

Bundan başqa, sözügedən qarşılaşmada qırmızı vərəqə alan “Sivasspor”lu Hakan Arslana isə 3 oyunluq cəza verilib.