''Beşiktaş''ın yarımmüdafiəçisi Jozef de Souzanın ötən turdakı hərəkətinə görə cəzası məlum olub.

Xatırladaq ki, ''Ankaragücü'' ilə səfər oyununun final fitindən sonra yerli fanatlardan biri Cenk Tosun və Salih Uçana xəsarət yetirməyə çalışmışdı. Souza isə həmin azarkeşi tutaraq sakitləşdirməyə çalışdığı üçün qırmızı vərəqə almışdı. Türkiyə Futbol Federasiyasının nəzdində fəaliyyət göstərən Nizam-İntizam Komitəsi ''sambaçı''ya əlavə cəza verməyə ehtiyac görməyib. Souza yalnız qırmızı vərəqəyə görə avtomatik bir oyun buraxmalı olacaq. Halbuki ''idmançıya yaraşmayan hərəkət'' maddəsi ilə NİK-ə sövq edilən futbolçulara, adətən, 2-3 oyunluq cəza verilir. 33 yaşlı futbolçu bazar ertəsi ''İstanbul BŞ''yə qarşı oyunda meydana çıxa bilməsə də, artıq növbəti həftə komandasına yardım edə biləcək. ''Ankaragücü'' isə təhlükəsizliyi təmin edə bilmədiyinə və tribunaya biletsiz azarkeşlər daxil olduğuna görə 300 min lirə cərimələnib. Bundan başqa, paytaxt təmsilçisi növbəti ev oyununu azarkeşsiz keçirməli olacaq.