Ötən il dekabrın 14-də Argentina kubokunun qalibi olan “Estudiantes” azarkeşlərini növbəti dəfə sevindirə bilmədi.

"Football-plus.az" xəbər verir ki, halbuki neytral meydanda – Kordoba şəhərində “River Pleyt”ə qarşı keçirilən Argentina Superkuboku matçı məhz “tələbələr” üçün yaxşı başladı: artıq 3-cü dəqiqədə Xavyer Korrea Eduardo Domingesin komandasını hesabda önə keçirdi. Ölkə kubokunun son sahibi hesabdakı üstünlüyünü uzun müddət qoruya bildi. Lakin buenos ayreslilərin getdikcə artan təzyiqinə sona qədər davam gətirə bilmədi. 80-ci dəqiqədə müdafiəçi Zaid Romero təhlükəni sovuşdurmaq istəsə də, topu öz qapısına yönəltdi. Hesabın bərabərləşməsindən ruhlanan ölkə nəhəngi istəyinə əsas vaxta əlavə olunan dəqiqələrdə çatdı. Alyendronun vurduğu qol Argentina çempionatının son qalibinin qələbəsini təmin etdi. Martin Demiçelisin çalışdırdığı ölkə nəhəngi superkuboku 4-cü dəfə qazandı. Qeyd edək ki, bu, 2012/13 mövsümündən təşkil edilən turnirdə rekord göstəricidi. Başqa sözlə, “River” sahib olduğu rekordu yenilədi. “Boka Xuniors” bu kuboku 2, “Lanus”, “San Lorenso”, “Veles Sarsfild” və “Arsenal” isə hərəyə bir dəfə qazanıb.