Artıq Argentina çempionatında mövsümün əsas sualına cavab tapılıb. Çoxdan gözlənilən hadisə 25-ci turda baş verdi. “River Pleyt” finişə iki tur qalmış əsas izləyicisi üçün əlçatmaz oldu və iki ildən sonra növbəti çempionluğu qazandı.

"Football-plus.az" xəbər verir ki, Argentina çempionatında uzun müddət liderlik edən “River Pleyt” qələbəyə çox yaxın idi. Ölkə nəhəngi hesabat turu ərəfəsində “Talyeres de Kordoba”nı 9 xallıq fərqlə qabaqlayırdı. Başqa sözlə, hər şey “milyonçular”ın əlində idi. Martin Demiçelisin komandası evdə “Estudiantes”ə uduzmayacağı halda çempionluğu erkən rəsmiləşdirəcəkdi. Uduzmaq nədi, liqanın lideri doğma azarkeşlərinin böyük dəstəyi altında inamlı qələbə qazandı. Bu mövsüm yaxşı təsir bağışlayan qonaqlar ilk dəqiqələrdən paytaxt komandasının böyük təzyiqi qarşısında qaldı və aramsız hücumlara tab gətirə bilmədi. Hakimin start fiti yenicə səslənmişdi ki, Beltran Leandro Qonsalesin ötürməsi ilə hesabı açdı. Lider bununla kifayətlənmədi və De la Krus ilə Barkonun növbəti qolları ev sahiblərinin artıq 31-ci dəqiqədə üç top fərqli üstünlüyünü təmin etdi. Bundan sonra oyunun tempini bir qədər aşağı salan Demiçelisin komandası fasilədən sonra yalnız final fitini gözləməsi ilə yadda qaldı. Təşəbbüsü ələ alan “Estudiantes” 67-ci dəqiqədə qollardan birinin əvəzini çıxdı. Qalan vaxtda hesab dəyişmədi və “River Pleyt” 38-ci çempionluğu rəsmiləşdirməklə ölkə rekordunu yenilədi. Maraq üçün əzəli rəqib “Boka Xuniors”un indiyədək 35 dəfə Argentina çempionu olduğunu qeyd edək. Əlbəttə, Demiçelisin uğuru da vurğulanmalıdı. Baş məşqçi vəzifəsinə 2022-ci ilin dekabrında təyinat alan 42 yaşlı mütəxəssis ona göstərilən etimadı doğrultdu. “River Pleyt”in yetirməsi olan Demiçelisin vətəninə qayıtmazdan əvvəl “Malaqa”da köməkçi-məşqçi olduğunu, “Bavariya”nın U-19 və əvəzedicilərdən ibarət komandalarını çalışdırdığını da bildirək.

Liderin əsas izləyicisi də hesabına 3 xal yazdı. “Talyeres de Kordoba” səfərdə “Atletiko Urakan”a minimal hesabıyla qalib gəldi. Xavyer Qandolfinin çalışdırdığı komanda David Romeronun 85-ci dəqiqəddə vurduğu qolla mövqeyini qorudu. Mövsümü çox yaxşı keçirən Kordoba klubunun gümüş medallara sahib çıxmaq şansı öz əlindədi.

Nəhayət, “San Lorenso” ardıcıl iki heç-heçədən sonra qələbə qazandı. Ruben İnsuanın komandası səfərdə “Belqrano”ya minimal hesabla qalib gəldi. Hesabı 31-ci dəqiqədə açan qonaqların 51-ci dəqiqədə Rosanenin birbaşa qırmızı vərəqə almasına görə uzun müddət azlıqda oynadıqlarını da qeyd edək. “Talyeres de Kordoba”dan 2 xal geri qalan “San Lorenso” mövsümü 2-ci yerdə başa vurmaq şansını saxlayır.

Mövsümü boşa verən “Boka Xuniors” sona yaxın azarkeşlərində az da olsa, ümid oyatmağa çalışır. Əvvəlki çempion “Ximnasiya”ya 3:1 hesabı ilə qalib gələrək 9-cu yerdən bir pillə irəli çıxdı. Mariano Erronun komandası son 4 turda 10 xal qazanıb. Buna baxmayaraq, “göy-sarılar”ın növbəti mövsümə yeni baş məşqçi ilə başlamaq ehtimalı çoxdu.

25-ci tur
River Pleyt - Estudiantes 3:1
Beltran, 2. De la Krus, 18. Barko, 31-p. - Mendes, 67.
Atletiko Urakan - Talyeres de Kordoba 0:1
D.Romero, 85.
Belqrano - San Lorenso 0:1
Maroni, 31.
Lanus – Banfild 2:2
Belmonte, 45. Kambeses, 64-p. – Sosa, 13. İnsua, 58.
Qodoy Krus – Defensa y Xustisiya 2:2
Koneçni, 47. S.Rodriges, 69 – Tonyi, 62. Kaseres, 90+5.
Sarmyento - Veles Sarsfild 1:1
Monako, 90+10-p. – Xara, 90+12.
Union - Platense 0:0
Ximnasiya - Boka Xuniors 1:3
Kastilyo, 90 – Merentyel, 39. Medina, 74. Benedetto, 76.
Rasinq - Rosario Sentral 1:1
Pyovi, 22-p. - Velis, 37.
Sentral Kordoba – İndependyente 0:1
B.Martines, 40.
Arxentinos Xuniors – Kolon 1:0
Avalos, 68-p.
Arsenal – İnstituto 0:2
A.Martines, 64. A.Rodriges, 90+3.
Tiqre - Barrakas Sentral 0:1
Kantero, 90.
Nyuellz Old Boyz - Atletiko Tukuman 0:0

1. River Pleyt 25 18 3 4 45-16 57
2. Talyeres de Kordoba 25 14 6 5 39-20 48
3. San Lorenso 25 12 10 3 23-9 46
4. Lanus 25 11 9 5 35-25 42
5. Defensa y Xustisiya 25 11 8 6 33-21 41
6. Rosario Sentral 25 10 10 5 33-26 40
7. Estudiantes 25 10 9 6 28-22 39
8. Boka Xuniors 25 11 5 9 29-23 38
9. Qodoy Krus 25 10 8 7 33-28 38
10. Arxentinos Xuniors 25 10 7 8 27-19 37
11. Belqrano 25 10 5 10 20-22 35
12. Nyuellz Old Boyz 25 8 10 7 22-21 34
13. Barrakas Sentral 25 8 10 7 25-28 34
14. Rasinq 25 8 9 8 32-32 33
15. Platense 25 9 6 10 25-27 33
16. Atletiko Tukuman 25 7 10 8 22-27 31
17. Sarmyento 25 7 8 10 23-23 29
18. Sentral Kordoba 25 7 8 10 19-25 29
19. İnstituto 25 7 8 10 20-30 29
20. İndependyente 25 6 10 9 23-29 28
21. Tiqre 25 7 7 11 22-28 28
22. Ximnasiya 25 7 7 11 21-35 28
23. Veles Sarsfild 25 5 11 9 24-26 26
24. Union 25 5 11 9 17-25 26
25. Banfild 25 6 8 11 19-32 26
26. Kolon 25 4 13 8 19-28 25
27. Atletiko Urakan 25 4 7 14 16-29 19
28. Arsenal 25 5 3 17 16-34 18

Bombardirlər: M.Santos (Talyeres de Kordoba), Veqetti (Belqrano) - 13, N.Fernandes (Defensa y Xustisiya), Avalos (Arxentinos Xuniors) - 12, Beltran (River Pleyt), Kauteruçço (İndependyente), L.Dias (Lanus), Retegi (Tiqre) - 11.