“İcra Hakimiyyətindən deyiblər ki, afişa saxlamayın, sökün” – çarəsiz klub prezidenti
Futbol üzrə ölkə çempionatının 2-ci liqasının 19-cu turunda “Sheki City" "Şəmkir"i qəbul edib.
Oyun ev sahiblərinin minimal hesablı qələbəsi ilə başa çatıb. Xalını 31-ə çatdıran “Sheki City" turnir cədvəlinin 6-cı pilləsində qərarlaşıb. Klub prezidenti Elgün Hüseynov “Şəmkir”lə oyunun afişasının şəklini sosial şəbəkədə paylaşaraq belə yazmışdı:
“Şəkidə şəhərin heç yerinə afişa vurmağa qoymurlar. Həftəboyu yapışdırdığımız afişalar sökülür. Mən də afişanı evdə mətbəxin divarına vurmuşam, ümid edirəm ki, burda heç kimə mane olmuruq”.
“Football-plus.az” Elgün bəylə əlaqə saxlayıb, ona konkret kimlərin və hansı qurumların mane olduğunu soruşub:
“Yaşıllıq İdarəsi bizim afişaları sökmüşdü. Düşünürəm ki, ən azı futbol afişalarını saxlamaq olar. Özümüz həm yapışdırır, həm də sökürük, müvəqqəti olan şeydi. Dayanacaqlara yapışdırırıq, amma qalmır. İcra Hakimiyyətindən deyiblər ki, afişa saxlamayın, sökün”.
“Sheki City”nin xüsusi endirim kampaniyası həyata keçirdiyini də xəbər vermişdik. Belə ki, oyunlara bilet alan şəxslərin şəhərin bir neçə yerində endirimlə alış-veriş etməsi mümkündü. Bəs bu kampaniya bitdimi? Elgün Hüseynov bu suala da cavab verdi:
“100 şəkili” kampaniyası davam edir. Ayda 12-13 nəfər ianə edir. Bilet satışı kampaniyası yoxdu. Dünən – “Şəmkir”lə oyun ərəfəsində sosial şəbəkədə paylaşım etmişdim ki, komandamıza dəstək ola bilərsiz. Sosial şəbəkə hesabında onlayn qaydada 222, ümumilikdə 671 bilet satıldı”.
ƏSƏD SEYİDOV
Digər xəbərlər
