Dünən 1-ci liqada 12-ci tura start verildi.

İlk üç oyunda maraqlı nəticələr qeydə alındı. İmişlidə bölgənin eyniadlı təmsilçisi “Mingəçevir”i məğlub edə bilmədi. Xal itkisi Əsgər Abdullayevin komandasının çempionluq mübarizəsinə ciddi zərbə vurdu. “Araz Saatlı”nın “İrəvan”ı qəbul etdiyi görüşdə hesabı ev sahibləri açsa da, sona qədər əzmkarlıq göstərə bilmədilər. Belədə 2 qol vuran Qərbi Azərbaycan təmsilçisi evə qələbəylə döndü. “Karvan” isə “doğma divarlar” arasında məğlub oldu. Özü də autsayderlərdən “Zaqatala”ya...

Tura bu gün keçiriləcək oyunlarla yekun vurulacaq. “Qaradağ Lökbatan” aşkar autsayderlərdən “Difai Ağsu”nu qəbul edəcək. Lider bu rəqiblə görüşdə çətinlik çəkməməlidi. Amma və lakin... Azər Həşimovun yetirmələri ölkə kubokunun 1/8 finalında “Neftçi”yə qarşı (0:4) xeyli güc sərf edib. Oyunun fiziki, məğlubiyyətin psixoloji təsiri özünü göstərsə, qonaqlar üçün şans yarana bilər. Onu da nəzərə alaq ki, Ağsu təmsilçisi ötən tur iddialı “Karvan”ı məğlub edərək mövsümdə ilk qələbəsini qazanıb.

1-ci liqda ilin son oyununa Şamaxıda şahidlik edəcəyik. “Şirlər” gücünü MOİK üzərində sınayacaq. Ev sahibləri qış fasiləsinə yaxşı ab-havayla yollanmaq istəyirsə, mütləq qələbə qazanmalı və ilk “4-lük”də yerini qorumalıdı. Qəzənfər Abbasovun yetirmələri də oyuna ciddi yanaşacaq. Ortada liderlik şansı var və bundan maksimum faydalanmaq lazımdı.

25 dekabr
İmişli – Mingəçevir 0:0

Araz Saatlı – İrəvan 1:2
Sequn Omotoşo, 26 - Arsen Ağcabəyov, 45. Vüsal Qənbərov, 78.

Karvan – Zaqatala 0:2
Roini İsmayılov, 25-p. Uoren Lloyd, 84.

26 dekabr
Qaradağ Lökbatan – Difai Ağsu 5:2
Seyxan Fərəcov, 21-p. 82. Kənan Cəfərov, 28. Xəlil Bəşirov, 52. Mehdi Tahirov, 84 - Kamil Hüseynov, 6. Samir Əliyev, 88.
Bakı, “Neftçi Futbol” Mərkəzi (4-cü meydança). Saat 13.00.

Şamaxı – MOİK 2:0
Emin Zamanov, 7-p. Elşad Tağıyev, 73.
Şamaxı, şəhər stadionu. Saat 14.00.

Xal durumu: Qaradağ Lökbatan – 27, MOİK, Şamaxı – 22, İmişli, İrəvan – 20, Karvan – 18, Zaqatala – 16, Mingəçevir – 14, Difai Ağsu – 4, Araz Saatlı – 3.
Bombardirlər: Elşad Tağıyev (Şamaxı) – 11, Emin Zamanov (Şamaxı) – 7.

KƏNAN BAHADIR