Srağagün 1-ci liqada 4-cü tura yekun vuruldu.

Turun ilk matçında iddialı “Karvan” “Zaqatala” ilə qarşılaşdı. Yevlax təmsilçisi səfər matçında az qala məğlub olacaqdı. Son dəqiqələrdə vurulan ardıcıl qollar Kənan Kərimovun yetirmələrini sevindirdi. “Sülh”lə bitən matç zaqatalıların qələbəsizlik seriyasını 4-ə çatırdısa, qonaqlar liderlik uğrunda mübarizədə geri düşdü. Qeyd edək ki, bunda “Karvan”ın yeni transferi Uensley Ondonun avtoqolunun da payı oldu. İkinci oyunda “Difai Ağsu” güclü “Qaradağ Lökbatan”ı qəbul etdi. Matç ev sahiblərinin njövbəti uğursuzluğuyla nəticələndi. Belə ki, bölgə təmsilçisi bu dəfə də nə qol hesabını aça, nə də ilk qələbəsini qazana bildi. Azər Həşimovun komandası oyunun taleyini 29-cu dəqiqədə həll etdi. Daha dəqiq desək, lökbatanlılar Seyhan Fərəcovun penalti zərbəsini dəqiq yerinə yetirməsiylə növbəti 3 xalı hesabına yazdırdı.

Turun 3-cü qarşılaşmasında “İrəvan” “doğma divarlar” arasında “Araz Saatlı” ilə üz-üzə gəldi. Nazim Süleymanovun komandası rəqibini 7 cavabsız qolla darmadağın etməklə turnir cədvəlinin şəriksiz lideri oldu. Maraqlıdı ki, irəvanlılr geridə qalan 4 tur ərzində qol buraxmayıb. Qonaqların acı sonluqla bitən çıxışı isə davam edir. İndiyə qədər qapısında 20 qol görən “Araz Saatlı” bunların heç birinə qarşılıq verə bilməyib. Xalsız saatlılılar “zirzəmi”dən boylanır.

Turun mərkəzi oyunu Binədə gerçəkləşdi. MOİK güclülərin duelində “Şamaxı”nı məğlub etməyə çalışdı. Lakin ilk hissədə 2:1 hesablı üstünlük əldə edən ordu komandası 2-ci yarıda davamını gətirə bilmədi. Komandaların müvafiq olaraq 55 və 57-ci dəqiqələrdə azlıqda qaldığı matçda 3:3 hesablı heç-heçə qeydə alındı. Yekun nəticənin tərəflərə sərf etmədiyi oyundakı xal itkiləri “İrəvan”ı zirvəyə əyləşdirdi.

Nəhayət, turun sonuncu görüşü Mingəçevirdə baş tutdu. Bölgənin eyniadlı təmsilçisiylə “İmişli”nin qarşılaşdığı matç “sülh”lə bitdi –1:1.

1. İrəvan 4 3 1 0 10-0 10
2. Şamaxı 4 2 2 0 15-4 8
3.Karvan 4 2 2 0 8-3 8
4. MOİK 4 2 2 0 9-5 8
5. Qaradağ Lökbatan 4 2 1 1 4-2 7
6. İmişli 4 1 1 2 4-5 4
7. Mingəçevir 4 1 1 2 4-7 4
8. Zaqatala 4 0 3 1 4-6 3
9. Difai Ağsu 4 0 1 3 0-6 1
10. Araz Saatlı 4 0 0 4 0-20 0

Bombardirlər: Emin Zamanov (Şamaxı) – 5, İsa Zeynallı (MOİK) – 4.

Növbəti turun oyunları oktyabrın 18-19-da keçiriləcək: Karvan – MOİK, Qaradağ Lökbatan – Zaqatala, Araz Saatlı – Difai Ağsu, İmişli – İrəvan, Şamaxı – Mingəçevir.

KƏNAN BAHADIR