Dünən yığmalar səviyyəsində keçirilən yoldaşlıq oyunlarında həm maraqlı nəticələr, həm də göstəricilər qeydə alındı.

Əvvəlcə avstriyalı Kristof Baumgartner adını tarixə yazdırdı. O, Slovakiya ilə oyunda 6-cı saniyədə fərqlənməklə futbol tarixində yığmalar səviyyəsində vurulan ən erkən qolun müəllifi oldu! Əvvəlki rekord 2013-cü ildə qeydə alınmışdı. Həmin vaxt Lukaş Podolski Almaniyanın heyətində Ekvador ilə yoldaşlıq oyununda 7-ci saniyədə hesabı açmışdı.

Dünənki oyunlardan Braziliyanın ''Uembli''də Keynsiz İngiltərəni məğlub etməsi də diqqət çəkdi. Özü də görüşdə yeganə qolu ''Real''ın yeni transferi Endrik vurdu. Gənc istedad 18 yaşı tamam olmadığından Madrid nəhənginə yalnız bu yay yollanacaq. Yığmada 3-cü oyununda qol hesabını açan Endrik 17 yaş 8 ay 3 günlüyündə fərqləndi. Bu, Braziliya tarixində 4-cü göstəricidi. Yığmada Endrikdən daha gənc yaşda yalnız 3 futbolçu - Pele (16 yaş 8 ay 14 gün), Edu (16 yaş 10 ay 2 gün) və Ronaldo (17 yaş 7 ay 12 gün) qol vurub.

Bundan başqa İngiltərənin yoldaşlıq oyunları çərçivəsində evdəki 18 oyunluq məğlubiyyətsiz seriyası qırıldı. Son məğlubiyyət 2016-nın martında Niderland ilə oyunda qeydə alınmışdı. Maraqlıdı ki, dünən daha bir oyunda erkən qol qeydə alındı. Azərbaycanlı futbolsevərlərə də gözəl tanış olan Florian Virts Almaniyanın heyətində Fransa ilə səfər matçının 7-ci saniyəsində hesabı açmağa müvəffəq oldu. 2021-də yığma karyerasını bitirən, amma bu yaxınlarda fikrini dəyişərək geri dönən Toni Kroosun qayıdan kimi cəmi 7 saniyədə aktivinə məhsuldar ötürmə yazması diqqət çəkdi. Oyun almanların 2:0 hesablı qələbəsi ilə yekunlaşdı.

ƏLİ