Dünən İngiltərə çempionatının 29-cu turu çərçivəsində ''Mançester Yunayted'' öz meydanında Kriştiano Ronaldonun het-triki sayəsində ''Tottenhem''i məğlub edərək rəsmi matçlarda 3 oyunluq qələbəsiz seriyaya son qoydu.

Bu qarşılaşmada bir sıra önəmli faktlar qeydə alındı. Onların arasında ən diqqətçəkəni Kriştianonun rəsmi olaraq futbol tarixində ən çox qol vuran oyunçuya çevrilməsidi. Belə ki, portuqaliyalı superulduz karyerası ərzində vurduğu qolların sayını 807-yə çatdırmaqla uzun illərdi bu siyahıda 805 qolla zirvədə qərarlaşan Yozef Bitsanı geridə qoydu. 1930-50-ci illərdə oynamış çexiyalı forvardın aktivində qeyri-rəsmi mənbələrə görə 1500-yə yaxın qol var. Amma FİFA, eləcə də Beynəlxalq Futbol Tarixi Statistikası Federasiyası rəsmi olaraq bunlardan yalnız 805-ni qeydə alıb. Beləliklə, bir sıra rekordların müəllifi olan Ronaldo növbəti dəfə adını tarixə yazdırdı. Maraq üçün Lionel Messinin 759 qolla bu siyahıda 4-cü pillədə qərarlaşdığını bildirək. 37 yaş 35 günlüyündə het-trik edən Ronaldo premyer-liqa tarixində bunu bacarmış ən yaşlı 2-ci futbolçu oldu və bu siyahıda yalnız Teddi Şeringemdən geri qalır. Şeringem 2003-ün avqustun 26-da ''Portsmut''un heyətində ''Bolton''la oyunda 37 yaş 146 günlüyündə het-trik etmişdi. Ümumilikdə bu, Ronaldonun peşəkar karyerasındakı 59-cu het-trikdi. Messinin 55 het-triki var. Sonda onu da bildirək ki, ''Yunayted'' premyer-liqa tarixində evdə 400 qələbə həddinə çatan ilk komanda oldu. Manikunianlar buna 572-ci ev oyununda nail oldular (108 heç-heçə, 64 məğlubiyyət).