Hər futbolçu üçün komanda ilə qazanılan titullardan savayı fərdi uğurlar da az əhəmiyyət daşımır.

“Football-plus.az” xəbə verir ki, hər halda, adının “Ginnesin Rekordlar Kitabı”na düşməsini hər futbolçu arzulayır. Bu baxımdan XXI əsrə damğa vuran və hətta indiyə qədər də müqayisə olunan Lionel Messi ilə Kriştiano Ronaldo hamını bir baş üstələyir. “Ginnesin Rekordlar Kitabı”nın sosial şəbəkədəki rəsmi səhifəsində maraqlı bir məlumat dərc olunub. Orda ən çox rekordların müəllifi olan futbolçuların “5-liy”i müəyyənləşdirilib.

İlk pillədə Leo Messi qərarlaşıb. Onun hesabında rəsmi şəkildə kitaba salınmış 41 (!) rekord var. Onların arasında ÇL-də 50 qol həddinə ən gənc yaşda çatmaqla bağlı rekord da mövcuddu. Bunu bacaranda argentinalı superulduzun 34 yaşı var idi. 2012-də ÇL-in pley-offunda “Bayer-04”lə oyunda penta-trik edən Messi bu turnirdə bir oyunda ən çox qol vuran futbolçu rekordunu da əlində saxlayır. Düzdü, sonradan daha 2 futbolçu (Luis Adriano və Erlinq Holann) bunu bacardı. Amma Leo bunu edən ilk futbolçudu və üstəlik digər 2 oyunçudan fərqli 5 qolun hamısını oyun vəziyyətindən vurub. Bundan başqa, Leonun hesabında La Liqa tarixinin ən məhsuldar oyunçusu (474 qol) və turnirdəki legionerlər arasında ən çox oyun (520) keçirən futbolçu kimi rekordlar da var. Kriştiano əzəli rəqibindən çox da geri qalmır. Onun adı “Ginnesin Rekordlar Kitabı”na 40 dəfə düşüb! ÇL tarixinin ən məhsuldar oyunçusu (140 qolla) məhz Ronaldodu. Bundan başqa, portuqaliyalı superulduz bu turnirdə bir mövsümə ən çox qol vurmaq (2013/14, 17) və ardıcıl ən çox oyunda (11) qol vurmaq rekordlarının da müəllifidi. Ronaldo eyni zamanda DÇ tarixində het-trik etmiş ən yaşlı futbolçudu. 2018-də İspaniya ilə oyunda bunu reallaşdırarkən o, 33 yaş 130 günlüyünüdə idi. İlk “3-lüy”ü Robert Levandovski tamamlayır. Amma ünlü polşalı forvardın hesabında cəmi 9 rekord var, yəni Messi ilə Ronaldodan çox geridədi. Üstəlik bu rekordların, demək olar, hamısı onun 2015-ci ildə “Bavariya”nın heyətində “Volfsburq”a qarşı məşhur oyundakı mükəmməl performansı ilə bağlıdı. Həmin vaxt Levandovski sonradan meydana çıxaraq 9 dəqiqəyə penta-trik etmişdi! O, futbol tarixində ən tez het-trikin (3 dəqiqə 22 saniyə), ən tez pokerin (5 dəqiqə 42 saniyə) və ən tez penta-trikin (8 dəqiqə 59 saniyə) müəllifidi. 4-cü pillədə Kilian Mbappe qərarlaşıb. Onun yalnız 5 rekordu var. Bunların arasında Mbappenin “Qızıl top”a ən gənc namizəd olması da mövcuddu. Belə ki, onun adı 18 yaş 239 günlüyündə namizədlər arasına düşmüşdü. Bundan başqa, Mbappe DÇ-lərin finalında ən çox (4) qol vuran futbolçudu. “5-liy”in son pilləsində Neymar qərarlaşıb. Kitabda onun adı 4 dəfə qeyd olunub. “Sambaçı” Olimpiya Oyunları tarixində ən erkən qolun müəllifidi. 2016-da Hondurasla oyunda 14-cü saniyədə fərqlənmişdi. Təbii ki, Neymar həm də futbol tarixinin ən baha transferidi. PSJ 2017-də onu “Barselona”dan 222 milyon avroya transfer etmişdi. Bu rekordun qarşıdakı günlərdə Mbappe sayəsində yenilənəcəyi istisna olunmur.