"2024-cü ildə nəticələrdən asılı olmayaraq, millini bütöv bir şəkildə, tam dəstəkləyəcəyik. İlin sonunda isə təbii ki, nəticələrə uyğun qərarımızı və mövqeyimizi bildirəcəyik. Sadəcə, komandamıza yeni zaman müddətində şans verməyin tərəfdarıyıq. Bildiyiniz kimi, “Sector 11”in yaşlı qurdları ötən il “Göyqurdlar” adı altında tribunaya qayıtdı. İsveçlə matçdakı dönüşümüz hər kəsin yadındadı. 11-ci sektoru doldurub komandamıza durmadan sona qədər dəstək olduq. Adımıza layiq hazırladığımız “Qurd yuvaya geri döndü” konseptli xoreoqrafiyamızı hər kəs gördü. Bundan sonra da hamımız Azərbaycan bayrağının olduğu hər yerdə milli komandalarımıza dəstəyimizi əsirgəməyəcəyik. İsveçlə matçdakı tarixi qələbəmizdə hansısa yardımımız, qatqımız oldusa, bu bizim üçün ən böyük xoşbəxtlikdi. Tribunaya ara verdiyimiz illərdə yığma komandamızın dəstəksiz qalması, uğursuz nəticələri və ildən-ilə millinin oyunlardakı azalan azarkeş sayı bizi tribunaya dönüş qərarı verməyə sövq etdi".

"Fikrimcə, yığma komandaya ölkə futbolunu yaxşı tanıyan məşqçi başçılıq etməlidi. Tanımasa belə, ən azı bu regionun içindən çıxan biri olmalıdı ki, bizim futbol mentallığıyla tanış olsun. Millinin baş məşqçisi liqamızdakı bütün matçları yerində izləməlidi. AFFA gətirəcəyi məşqçinin önünə mütləq bu şərti qoymalıdı. Bu, yerli məşqçi olacaqsa yalnız Qurban Qurbanov olmalıdı. Əks halda mən türk məşqçinin gətirilməsinin tərəfdarıyam. Dil, məsafə, mədəniyyət, həm də futbol inkişafı baxımından bu düşüncədəyəm. Komandamızda hər ölkədən məşqçilər işləsə də, heç vaxt türk baş məşqçi işləməyib. Əcnəbi məşqçi olacaqsa, bu yalnız Türkiyədən biri olmalıdı".