Millətlər Liqasında növbəti oyunlarını keçirməyə hazırlaşan Türkiyə yığmasında heyətə dəvət olunan futbolçuların siyahısı açıqlanıb.

Xatırladaq ki, bu turnirdə C liqasında çıxış edən qardaş ölkə Lüksemburq, Litva və Farer adaları ilə birlikdə 1-ci qrupda yer alır. 4 turdan sonra maksimum xal toplayan və 14-0 top fərqinə malik olan ''ay-ulduzlular'' sentyabrın 22-də Lüksemburqu qəbul edəcəksə, 26-da Farer adalarının qonağı olacaq. İlk görüş ''Fatih Terim''də baş tutacaq və Bakı vaxtı ilə saat 22.45-də başlayacaq. İkinci oyun isə Torshavnda keçiriləcək. Bu yığma pəncərəsində sayca 3-cü dəfə keçirilən Millətlər Liqasında qrup mərhələsinə yekun vurulacaq. Türkiyənin budəfəki heyətində yenə sürprizlər var. Baş məşqçi Ştefan Kunts ''Kayserispor''lu Onur Buluta ilk dəfə dəvət göndərib. Yəni yalnız bir debütant var. Bundan əvvəlki siyahıda olan oyunçulardan Cenk Özkaçar və gənc forvard Tyaqo Çukur yaxşı formada olmadıqlarına görə, Dorukhan Toköz, Mərt Müldür, Hakan Çalhanoğlu və Doğukan Sinik isə zədə üzündən heyətdən kənarda qalıblar. Əvəzində müəyyən fasilədən sonra İrfan Can Kahveci və Sərdar Gürlər yenidən yığmaya dəvət alıb. Siyahıda əsas sürpriz isə orda ''Beşiktaş''dan heç bir futbolçunun olmamasıdı! Kunts tərəfindən mayda açıqlanan heyətdə ''Qartal''dan yalnız Rıdvan Yılmaz yer almışdı. Amma gənc müdafiəçi artıq ''Beşiktaş''ı tərk edərək ''Reyncers''ə yollanıb. İstanbul nəhəngi mövsümə heç də pis start verməyib. Bu üzdən ''ağ-qaralar''dan heç bir oyunçuya dəvət göndərilməməsi sosial şəbəkələrdə böyük etirazla qarşılanıb. 23 nəfərlik siyahını sizə təqdim edirik: qapıçılar – Uğurcan Çakır (Trabzonspor), Altay Bayındır (Fənərbaxça), Doğan Ələmdar (Renn); müdafiəçilər – Onur Bulut (Kayserispor), Zəki Çəlik (Roma), Çağlar Söyüncü (Lester), Kaan Ayhan (Sassuolo), Merih Dəmiral (Atalanta), Ozan Kabak (Hoffenhaym), Ərən Elmalı (Trabzonspor), Fərdi Kadıoğlu (Fənərbaxça), Rıdvan Yılmaz (Reyncers); yarımmüdafiəçilər – Cengiz Ündər (Marsel), İrfan Can Kahveci (Fənərbaxça), Orkun Kökçü (Feyenoord), Salih Özcan (Borussiya D), Sərdar Gürlər (İstanbul BŞ), Yunus Akgün, Berkan Kutlu, Kərəm Aktürkoğlu (hamısı ''Qalatasaray''); hücumçular – Enes Ünal (Xetafe), Sərdar Dursun (Fənərbaxça), Xəlil Dərvişoğlu (Bernli).