Hər iki komanda üçün bu oyunun əhəmiyyəti böyük idi.

Axı “Neftçi” cümə günü “Səbail”i darmadağın etməklə 2-ci pilləyə yüksəlmişdi. Sumqayıtda meydana çıxan komandaların hər biri qələbə təqdirində “ağ-qaralar”ın yerini tutacağını anlayırdı.

Sözü çox uzatmadan oyuna keçək. İlk dəqiqələrdən qarşılıqlı hücum cəhdlərinə şahidlik etdik. Renduliçin yetirmələrinin daha fəal olduğu isə gözdən yayınmadı. Elə bu fəallıq qarşılaşmanın 25-ci dəqiqədə bəhrə verdi. Qonaqlar real qol fürsətini maksimum şəkildə dəyərləndirdi. Belə ki, sağ cinahdan Aminin cərimə meydançasına etdiyi ötürmə zamanı Xaçayev topu istədiyi kimi uzaqlaşdıra bilmədi, epizodun davamında topu ələ keçirən Parris komanda yoldaşı Nuriyevin sərbəst olduğunu görüb, ona ötürmə verdi. Anatoli isə sağ iti bucaq altından qüvvətli zərbəylə topu Mehdinin ayaqları arasından tora göndərdi – 0:1. Qoldan sonra daha da ruhlanan “tələbələr” rəqib üzərindəki təzyiqini artırmağa çalışırdı. Meydan sahibləri isə müdafiədən çıxmaqda çətinlik çəkirdi. Qonaqların nisbi üstünlüyü olsa da, heç bir komanda real qol vəziyyəti yarada bilmirdi. Sadəcə, ilk hissəyə artırılan vaxtda Volkov əks-hücumda rəqibini cəzalandırmaq istəsə də, zərbəsi qapıdan aralı keçdi. İkinci yarıda, təbii ki, oyunun axarı dəyişdi. Artıq meydan sahibləri daha fəal idi. Yeri gəlmişkən, Samir Abasovun süst Nihad Əhmədzadəni Erik Sorqa ilə əvəzləməsinin də bu fəallıqda rolu oldu. “Sumqayıt”ın oyundakı ilk real qol vəziyyəti 57-ci dəqiqəyə təsadüf etdi. Oktavionun müdafiənin arxasına etdiyi ötürməni Səbuhi qüvvətli zərbəylə “çərçivə”yə yönəltdi. Bu dəfə Mehbalıyev səliqəli oynayaraq, topu dəf etməyi bacardı. Abasovun yetirmələrinin fəallığına baxmayaraq, qonaqlar 62-ci dəqiqədə hesab arasındakı fərqi artırdı. Komandasının ilk qolunda pay sahibi olan Amin bu qolda da önəmli rol oynadı. Belə ki, müdafiəçinin sağ cinahdan cərimə meydançasında göndərdiyi ötürməni Xaçayev bu dəfə də doğru şəkildə uzaqlaşdıra bilmədi. Onun ehtiyatsız hərəkətindən sonra Cənnətovu da çatdıran top qapıya daxil oldu – 0:2. Oyun davam edir, rəqibin qələbəsi ilə barışa bilməyən “kimyaçılar” təzyiqi artırırdı. 66-cı dəqiqədə “Sumqayıt”ın yeni transferi Xordanın ötürməsini Ninqa sinəsiylə ram edərək, yaxın “doqquzluğ”a göndərdi. Lakin qolkiper bu dəfə də səhvsiz oynadı. Bir qədər sonra rəqibin cərimə meydançası daxilində Oktavionun daban ötürməsindən sonra Rövlan şansını sınadı. Lakin onun zərbəsi qüvvətli alınmadı və qapıçı çətinlik çəkmədən topu tutdu. Artan təzyiqin, aramsız hücumların mükafatı 84-cü dəqiqədə gəldi. Səbuhinin ötürməsindən sonra Sorqa rəqib müdafiəçiləri çaş-baş salaraq sağ “9-luğ”a qarşısıalınmaz zərbə vurdu – 1:2. Fərqin azaldığını görən Abasovun yetirmələri bütün gücüylə hücuma atıldı. Uzatma dəqiqələrində Kamranın göndərdiyi ötürmə zamanı Xordan başla qeyri-dəqiq oldu. Beləliklə, “Sabah” Renduliçin rəhbərliyi altında çıxdığı ikinci oyundan da qalib ayrılaraq turnir cədvəlinin 2-ci pilləsinə yüksəldi. “Sumqayıt” isə turun başqa oyunlarının da nəticəsində 5-ci pilləyə endi.

Gözdən qaçmadı
* “Sumqayıt”ın futbolçuları “Kimyaçılar” azarkeş qrupunun yaranmasının 10 illiyi şərəfinə üzərində “Kimyaçılar” yazılan 10 nömrəli forma ilə meydana çıxdı.
* Samir Abasov yan xətt hakimi Zeynal Zeynalova etiraz edərkən texniki zonasını tərk etdiyindən Əliyar Ağayev onu sarı vərəqəylə cəzalandırdı.
* “Sabah”ın gənc futbolçusu Rauf Rüstəmli əsas komandanın heyətində debüt matçına çıxdı.
* Sumqayıtın “Sumqayıt Ultras”, “Kimyaçılar Ultras” və “Kimyaçılar”, “Sabah”ın isə “Soldati di Sabah” azarkeş qrupu tribunadaydı. KAMAL SƏFƏR