Borussiya D – PSV 2:0 (1:0)
Borussiya (Dortmund, Almaniya): Kobel, Zyule, Əmrə Can, Hummels, Maatsen, Salih Özcan, Zabitser, Malen (Adeyemi, 70), Brandt (Nmeça, 58), Sanço (Roys, 75), Füllkruq.
PSV (Eyndhoven, Niderland): Benites, Teze, Shouten, Boskalyi, Dest, Veerman (Pepi, 82), Til (Losano, 46), Mauro (Babadi, 86), Bakayoko, Tillmann, De Yonq.
Qollar: Sanço, 3 (1:0). Roys, 90+5 (2:0).
Vərəqələr: Zyule, 88. Nmeça, 89 – sarı.
Hakim: Daniele Orsato (İtaliya).
13 mart. Dortmund. 81365 tamaşaçı.
İlk oyun – 1:1.

Bu mövsüm öz çempionatında məğlubedilməz olan PSV-nin ilk oyundakı bərabərlikdən sonra şansı azalsa da, komanda Dortmunda böyük ümidlərlə gəlmişdi. “Borussiya” oyuna fırtına kimi başladı. Artıq 2-ci dəqiqədə oyuna qoşulmalı olan Benites Maatsenin zərbəsini dəf etsə də, növbəti hücumda Sançonun yaxın küncə yönələn zərbəsini qaytara bilmədi. İngiltərəli vinger buna qədər ÇL-də son qolunu 841 gün öncə - 2021-ci il noyabrın 23-də “Yunayted”in heyətində səfərdə “Vilyarreal”a vurmuşdu. Erkən qoldan şoka düşən və özünü itirən PSV çox keçmədən ikinci dəfə topu tordan çıxara bilərdi. Amma Füllkruq sanki intriqanın ölməsini istəməyərək qonaqları əfv etdi. Hissənin ortalarında Malen da yaxın məsafədən topu düz qapıçının üstünə vurmaqla gözəl fürsəti dəyərləndirə bilmədi. PSV Dortmunda futbola baxmağa yox, futbol oynamağa gəldiyini anlayaraq yavaş-yavaş oyunu meydanın rəqibə aid hissəsinə keçirməyi bacardı. Amma Hummels başda olmaqla “Borussiya”nın müdafiəçiləri birinci hissədə əla təsir bağışladılar. İlk yarıda ən azı 3 qol buraxmalı olan PSV üçün hələ heç nə bitməmişdi. Eyndhoven təmsilçisi ikinci hissənin ilk 25-30 dəqiqəsində üstünlüyə malik olsa da, bu üstünlüyü heç cür qola çevirə bilmədi. Losanonun zərbəsindən sonra meydan sahiblərini yalnız dirək xilas etdisə, Bakayoko və De Yonq da yaxşı fürsətləri əldən verdi. Belə təəssürat yaranırdı ki, qonaqların qolu, sadəcə, zaman məsələsidi. Çünki “arılar” topu heç cür özlərində saxlaya bilmirdilər. 77-ci dəqiqədə Füllkruqun oyunun məntiqi axarına uyğun olmayan qoluna ofsayd qərarı verən VAR mane oldu. Matçın kuliminasiya nöqtəsi əsas vaxta əlavə olunan dəqiqələrə təsadüf etdi. Gözəl hücumdan sonra De Yonq faktiki Kobellə təkbətək çıxdı. Amma təcrübəli forvard yaxın məsafədən topu tora göndərmək əvəzinə onu qapının üstündən vurdu. Çox keçmədən hər kəsə gözəl tanış olan futbolun yazılmamış qanunu işə düşdü. Adi epizodda ayağı sürüşən PSV-nin müdafiəçisi yerə yıxıldı. Topu ələ keçirən və Beniteslə duelə yollanan təcrübəli Roys soyuqqanlı şəkildə topu tora göndərərək yekun nəticəni müəyyənləşdirdi. Beləliklə, bu cütdə rəqibdən üstün görünən “Borussiya” ədalətli şəkildə növbəti mərhələyə yüksəldi.

oyunun statistikası
15 (7) qapıya (“çərçivə”yə) zərbə 17 (7)
5 künc zərbəsi 4
2 ofsayd 2
7 qayda pozuntusu 8
2(0) sarı (qırmızı) vərəqə 0(0)
52 topa sahibolma (faizlə) 48

Faktlar
* Terziç “Borussiya”nı 2-ci dəfə ÇL-də 1/4 finala yüksəltdi. İlk dəfə bu hal 2020/21-də yaşanmışdı. Bununla da Terziç Ottmar Hitsfeld (1995/96, 1996/97) və Yürgen Kloppdan (2012/13, 2013/14) sonra dortmundluları iki fərqli mövsümdə 1/4 finala daşıyan 3-cü mütəxəssis oldu.
* “Borussiya” ÇL-də öz meydanında keçirdiyi son 20 oyunun yalnız ikisində uduzub (11 qələbə, 7 heç-heçə).
* “Borussiya” avrokubokların pley-offunun cavab oyunu çərçivəsindəki 9 matçlıq qələbəsiz seriyaya son qoydu (4 heç-heçə, 5 məğlubiyyət).
* “Borussiya” PSV-yə qarşı keçirdiyi 4-cü oyunda da uduzmadı (2 qələbə, 2 heç-heçə).
* “Borussiya” pley-offa səfər heç-heçəsi ilə başladığı son 10 halın 9-da mərhələni adlamağı bacarıb.
* PSV səfərdə Almaniya klublarına qarşı keçirdiyi ardıcıl 17-ci oyunda qələbəyə həsrət qaldı (3 heç-heçə, 14 məğlubiyyət).

Oyundan sonra...
Edin Terziç, Dortmund “Borussiya”sının baş məşqçisi: