Türkiyənin bir çox klubunun maddi durumunun yaxşı olmaması heç kimə sirr deyil.

Football-plus.az xəbər verir ki, ona görə də qardaş ölkə təmsilçilərinə FİFA tərəfindən tez-tez transfer qadağası qoyulur. Belə klubların sırasına “Antalyaspor” da qoşulub.

Antalya təmsilçisinin belə desək, başını dərdə soxan oyunçular Entso Krivelli ilə Pol Mukairudu. Hər iki futbolçu ötən mövsüm antalyalıların şərəfini qoruyub. Krivelli türkiyəli futbolsevərlərə “İstanbul BŞ”dəki çıxışı ilə tanışdı. 2 mövsüm bu klubun şərəfini qoruyan 27 yaşlı fransalı forvard 2021/22-nin ilk dövrəsini icarə əsasında “Antalyaspor”da keçirmiş və ardından “Sent Etyen”ə yollanmışdı.

22 yaşlı Mukariu isə faktiki olaraq klubun öz yetirməsi sayılır. “Antalyaspor” skautları 2018-də nigeriyalını təsadüfən kəşf edərək onu klubun aklademiyasına dəvət etmişdilər. 2020/21-i icarə əsasında “Anderlext”də keçirən futbolçu ötən mövsümün qış fasiləsində başını götürüb qaçdı və o vaxtdan bu yana “Kopenhagen”də çıxış edir. Həm Krivelli, həm də Mukairu pulunu ala bilmədiyinə görə FİFA-ya şikayət etmişdi. Bu şikayətə yalnız bu günlərdə baxan FİFA onları haqlı sayıb və “Antalyaspor”a bir dönəm üçün transfer cəzası verilib. Klubun 2 futbolçuya ümumilikdə 600 min avrodan çox borcu var.

Ümumiyyətlə, Türkiyə mətbuatının yazdığına inansaq, “Antalyaspor”un tək bu iki oyunçuya yox, bir çox futbolçuya borcu var. Ötən mövsümün son 2 ayından başayaraq futbolçuların maaşları və mükafatları normal qaydada ödənilmir. Ötən yay əslində Antalya klubu Mukairuya görə “Nottingem Forest”dən 2,3 milyon avroluq təklif almışdı. Nədənsə, rəhbərlik bu tələbi rədd etmiş, amma qışda qaradərili futbolçu “Kopenhagen”ə 1,9 milyon avroya satılmışdı. Maraq üçün bildirək ki, Krivelli “Antalyaspor”da keçirdiyi 14 rəsmi oyunda qol və məhsuldar ötürmə ilə fərqlənməmişdi. Mukairu isə 53 rəsmi oyunda 8 qol, 2 məhsuldar ötürməlik performans göstərmişdi.