Bu mövsüm adından söz etdirməyi bacaran gənc qürbətçi türkiyəli futbolçu Can Uzundan yeni xəbər var.

Bilindiyi kimi 2-ci bundesliqa təmsilçisi ''Nürnberq''də top qovan və bu mövsüm 24 rəsmi oyunda 16 qol, 3 məhsuldar ötürmə ilə diqqət çəkən 2005-ci il təvəllüdlü Can bir müddət öncə yığma ilə bağlı seçimini etmişdi. O, qəlbinin səsini dinlədiyini vurğulamış və Türkiyə yığmasına üstünlük verdiyini açıqlamışdı.

''Ay-ulduzlular''ın baş məşqçisi Vinçentso Montellanın bu ay baş tutacaq yoldaşlıq matçları üçün Cana da dəvət göndərəcəyi gözlənilir. Bu arada 18 yaşlı oyun qurucusunun yeni klubunun adına aydınlıq gəlib. Almaniyanın yüksək tirajlı ''Bild'' nəşrinin yazdığına inansaq, bu futbolçu bazar ertəsi Frankfurta gələrək tibbi müayinədən keçib və tərəflər arasında artıq yazılı anlaşma əldə olunub.

Beləliklə, qeyri-adi bir şey baş verməsə, Can Uzun yeni mövsümdən etibarən ''Ayntraxt''ın şərəfini qoruyacaq. Xəbərdə qeyd olunub ki, bu transfer frankfurtlulara 10 milyon avroya başa gələcək.

ƏLİ