Turunun ilk qarşılaşmasında “Səbail”lə “Sumqayıt” üz-üzə gəldi.

Hər biri 2-ci yer uğrunda mübarizə apardığından meydanda gərgin mübarizə yaşanacağı şübhə doğurmurdu. İlk dəqiqələrdən qonaqların üstünlüyü və topa nəzarəti gözdən qaçmadı. Amma buna təəccüblənmədik. Çünki Diniyevin komandası, adətən, bütün oyunların ilk hissəsində müdafiə olunur, ikincidə rəqibi cəzalandırmağın yolunu tapır. Bu dəfə ssenari pozuldu. 10-cu dəqiqədə Bədəlov topu müdafiəçilərin arxasına göndərdi, Ninqa yumşaq baş zərbəsi ilə hesabı açdı. Mdafiəçilərlə yanaşı, Səlahətin də kobud səhvini danmaq olmaz. Belə ki, qapıçı ötürmə anında irəli atılıb topu götürə biləcəyi halda, qapı xəttində dayanmağı seçdi və cəzalandı. Qoldan ruhlanan Abasovun yetirmələri hücumda daha da fəallaşdı. Ninqa cərimə meydançasından kənarda önünün boş olmasından istifadə edib qapıya qüvvətli zərbə vurdu. Qolkiper bu dəfə səhvsiz çıxış etdi. 29-cu dəqiqədə “kimyaçılar” yenə fərqi artırmağa yaxın oldu. Səbuhinin sol cinahdan iti bucaq altından qüvvətli zərbəsi dirəyə tuş gəlib geri qayıtdı, Ninqanın zərbəsinin qarşısını isə Mehremiç aldı. 38-ci dəqiqədə növbəti qol vəziyyəti yarandı. Bu dəfə isə meydan sahiblərinin bombardiri Ramalinqom Pedronun ötürməsindən sonra topu qapı dirəyinə vurdu.

2-ci hissə birmənalı şəkildə “Səbail”in diqtəsi altında keçdi. 67-ci dəqiqədə qonaqların qapısına penalti təyin olundu. Masikanın qapıya zərbəsi zamanı top Rövlanın qoluna dəydi və bu məqam hakimin gözündən qaçdı. Amma bu məqamda Diniyev çox maraqlı addım atdı. Daha doğrusu, səhvə yol verdi. Komandanın əsas penalti ustası Ramalinqomu meydandan çıxarmağın adı nə idi?! Belədə “nöqtə”yə yaxınlaşan Pedro Nuno Cənnətovla mübarizədən məğlub ayrıldı. Meydan sahiblərinin sonuncu cəhdi isə uzatma dəqiqələrinə təsadüf etdi. Luqasinin ötürməsini Mehremiç düzgün dəyərləndirə bilmədi.
Beləliklə, “Sumqayıt” bu qələbə sayəsində yenidən tunir cədvəlində 2-ci pilləyə yüksəldi, məğlub “Səbail”i 5-ci pilləyə düşdü.
Gözdən qaçmadı

* Komandalar meydana çıxanda “8 Mart Beynəlxalq Qadınlar Gününnüz Mübarək” yazılan baneri yerdən qaldırdılar. Bununla da xanımları bayram münasibətiylə təbrik etdilər. Əlavə olaraq “Səbail”in qızlardan ibarət U-14 komandalarının üzvlərinə gül dəstələri verdilər.
* Oyundan əvvəl “Səbail”in Müşahidə Şurasının üzvü Əbdülqəni Nurməmmədov Adil Nağıyevə ölkə çempionatında 200-cü oyuna çıxdığına görə xüsusi forma təqdim etdi.
* “Kimyaçılar” azarkeş qrupu yetərincə fəal idi, hətta “Dənizçilər”in səsini eşidilməz etmişdi.
* 80-88-ci dəqiqələr aralığında hesab tablosu işləmədi.
* Murata əvəzlənməsinə çox sərt şəkildə etiraz etdi, Samir Abasovun əlini çıxmadı, formasını çıxararaq ehtiyat oyunçular skamyasındakı oturacağa çırpdı. Baş məqşçi oyundan sonra ona səhvlərini uzun-uzadı izah etdi.
* Şahin Diniyev epizodların birində futbolçusu ilə mübarizədə rəqib oyunçunun yerdə qalmasına görə baş hakimin matçı dayandırmasına etirazını 4-cü hakimə bildirdi: “Fərid, korpus qoyub”. Sonradan əsas vaxta 5 dəqiqə əlavə olunmasına görə də gileyləndi: “Fərid, gördün? Nə artırıldı ki...”

KAMAL SƏFƏR