Yenilənmiş Mehdi Hüseynzadə adına şəhər stadionunda uzun fasilədən sonra ilk dəfə premyer-liqa oyunu keçirildi. Oyundan əvvəl tanınmış müğənnilər Hiss və Murad Arif azarkeşləri feyziyab etdi.

Oyuna hədsiz böyük maraq var idi, tribunaların təxminən 75 faizi dolmuşdu. Oyun 1966-cı ildə bu arenada keçirilən ilk oyunda fərqlənmiş Telman Salahovun rəmzi toxunuşu ilə başladı. Meydan sahibləri ilk dəqiqələrdən topa nəzarət etməyə, hücum qurmağa cəhd göstərirdi. 6-cı dəqiqədə Ninqa qapıçı ilə üz-üzə qaldığı epizodda dəqiq ola bilmədi. Lakin çox keçmədən Manteka gözəl ötürmə ilə onu yenidən zərbə mövqeyinə çıxardı. Kasimir ikinci cəhddə hesabı açdı. O, həm də yenilənmiş stadionda ilk qolun müəllifi kimi tarixə düşdü. “Neftçi” isə ilk təhlükəli vəziyyəti 24-cü dəqiqədə yaratdı. Emin Mahmudovun cərimə meydançası kənarından qüvvətli zərbəsi “çərçivə”yə düşmədi. Əvəzində yenidən səhnəyə Ninqa çıxdı. O, Dossonun ötürməsini bilyardvari zərbə ilə qola çevirdi – 2:0. İlk hissənin son dəqiqəsində Boqomolski fərqi minimuma endirməyə yaxın olsa da, topu qapıdan aralı vurdu.
İkinci yarı isə bakılıların üstünlüyü şəraitində başladı. Kornerdən gələn topu Moreno başla qapıya göndərdi. Qolkiperi də keçən topu Murata qapı xəttindən çıxardı. 73-cü dəqiqədə Ninqanın gözəl cinah asmasını Dosso zərbə ilə tamamladı. Lakin Abu dəqiq ola bilmədi. Epizodun davamında “Neftçi” futbolçuları əks-hücuma çıxdı. Müdafiənin səhvindən yararlanan Ozobiç təxminən 7 metrdən topu qapıçının üstünə vurdu. 88-ci dəqiqədə Mirzovun baxımlı zərbəsi dirəyin yanından küncə çıxdı. Hər halda, “ağ-qaralar” təsəlli topunu vurmağı bacardı. Ninqanın Matiasa qarşı kobudluğunu VAR penalti kimi qiymətləndirdi. Ozobiç zərbəni dəqiq yerinə yetirdi – 1:2.

Beləliklə, xalını 34-ə çatdıran “Sumqayıt” “Neftçi”ni arxada qoyaraq 2-ci pilləyə yüksəldi.

Gözdən qaçmadı
* Matçı izləyənlər arasında ekologiya və təbii sərvətlər naziri Muxtar Babayev, SOCAR-ın prezidenti Rövşən Nəcəf, Sumqayıtın icra başçısı Zakir Fərəcov, AFFA rəsmiləri Elşad Nəsirovla Vaqif Sadıqov, deputatlar Müşfiq Məmmədli və İmamverdi İsmayılov da var idi.
* Sonda “Sumqayıt” ehtiyat oyunçuları və məşqçilər korpusu oyunun bitdiyini düşünərək meydana çıxdı. Lakin həmin vaxt hakim hələ final fitini çalmamışdı.
* Samir Abasov mətbuat konfransına xüsusi köynəklə gəldi. O, üzərində öz fotoşəkli və məşqdə ən çox işlətdiyi sözlər, arxasında isə “canavarlar” yazılan köynəklə jurnalistlərin qarşısına çıxdı. Abasovun dediyinə görə, bunu ona komanda üzvləri hədiyyə edib və “qalib gələcəyik, siz isə bu köynəklə çıxış edəcəksiz” deyiblər.
* Klubun mətbuat xidmətinin rəhbəri Zaur Xudiyev köynəyin üzərində yazılan sözləri oxuyarkən Abasov “hamısını oxuma, söyüş də var”, - deyə zarafat etdi.

İSMAYIL XEYRULLAYEV