İtaliya çempionatında növbəti istefa baş verib. Amma bu dəfə baş məşqçinin qovulmasına heç də uğursuz nəticə səbəb olmayıb.

“Leççe” rəhbərliyi Roberto D’Aversa ilə yolları ayırıb. Qərar A seriyasının 28-ci turunun “Verona” ilə matçından sonra baş məşqçinin etdiyi hərəkətə görə verilib. Belə ki, oyundan sonra çalışdırıcı rəqibin futbolçusu Toma Anrini kəllə ilə vurub. Buna isə fransalı hücumçunun matçın son dəqiqələrində leççelilərin oyunçusu Marin Ponqraçiçlə mübahisə etməsi səbəb olub. Hakim hər iki futbolçunu sarı vərəqə ilə cəzalandırıb. Görünür, ev sahiblərinin baş məşqçisi Tomanın xəbərdarlıqla canını qurtarmasından razı qalmayıb.

D’Aversa “Leççe”ni 2023-cü ilin yayından çalışdırırdı. Komanda hazırda İtaliya çempionatında 25 xalla 15-ci yeri tutur.