Stajlı “Beşiktaş” fanatları Paskal Numanı gözəl xatırlayır.

"Football-plus.az" xəbər verir ki, Hələ futbol oynadığı dönəmlərdə aqressivliyi ilə seçilən, dəfələrlə müxtəlif qalmaqalların iştirakçısı olan Numanın başı yenə dərddədi. Hazırda 52 yaşı olan sabiq futbolçu 2 uşağı döyməkdə günahlandırır. O artıq günahını etiraf edib. Amma dediyinə görə, uşaqları səbəbsiz yerə döyməyib. Türkiyə mətbuatının iddiasına görə, Numa İstanbulun Göktürk adlanan ərazisindəki evinin yaxınlığından maşını ilə keçərkən onun qulağına mahnı oxuyan 13 yaşlı iki uşağın işlətdiyi ifadələr çatıb. Uşaqlar ingilis dilində mahnı oxuyurdular və orda bəzi irqçi ifadələr yer alırdı. Numa bu sözləri özünə götürdüyü üçün əvvəlcə əl-qol hərəkətləri ilə uşaqlara etirazını bildirdi. Uşaqlar qorxaraq qaçsa da, hirsi soyumadığı üçün daha sonra maşını ilə onları təqib etməyə başladı. Maşından düşən sabiq futbolçu uşaqlardan birinin saçından tutaraq yerə yıxdı və onu təpikləməyə başladı. Hər iki uşaq elə həmin gün ailələri ilə birlikdə həkimdən döyülmələri ilə bağlı rəsmi sübut aldılar. Daha sonra isə polis bölməsinə gedərək Numadan şikayət etdilər. Hətta uşaqlardan birinin arxadan çəkilmiş şəkili də sosial şəbəkələrdə yayılıb. Başının arxasında yaralar əmələ gəldiyini deyən uşağın bədənində həqiqətən də zorakılıq izləri var. İddialara cavab verən Numa uşaqları döydüyünü boynuna alıb. Amma bunu onların irqçi sözlərindən sonra etdiyini deyib və hadisənin də məhz bu üzdən baş verdiyini bildirib. Numa da öz növbəsində irqçi təhqirlərə məruz qaldığı üçün uşaqlardan şikayət edib. Qeyd edək ki, 2000-ci illərin əvvəllərində “Beşiktaş”da top qovmuş Numa karyerasını bitirəndən sonra futboldan uzaqlaşıb. “Beşiktaş”ın rəsmi üzvü olan və Türkiyə vətəndaşlığını qəbul edən Numa bir ara “Survivor” şousundakı iştirakı ilə diqqət mərkəzinə düşmüşdü. Son illərdə isə o, daha çox filmlərə və seriallara çəkilir.