Son günlər Türkiyə mətbuatında daha çox bir “Qalatasaray” azarkeşini döyməsi xəbəri ilə gündəmə gələn “Beşiktaş”ın əfsanəsi Paskal Numa ilə bağlı bu dəfə daha pozitiv bir xəbər var.

51 yaşlı sabiq Kamerun əsilli fransalı forvard srağagün Balıkəsir Böyükşəhər Bələdiyyəsi tərəfindən təşkil olunan “Məhəllə Liqası” adlı futbol turnirinin açılış mərasimində iştirak edib. Dursunbəy qəsəbəsində keçirilən turnirə əsasən yeniyetmə futbolçular qatılıb. Bu turnir çərçivəsində Numa həmin zonada futbola maraq göstərən uşaqlarla görüşərək onlarla söhbət edib və məsləhətlərini verib. Səmimi ab-havada keçən həmin görüş zamanı qeyri-adi hadisə baş verib. Məsələ burasındadı ki, 11 yaşlı Yasin Aras söhbət əsnasında Numaya belə desək, öz ürəyini açıb. O, futbola çox böyük marağının olduğunu, yaxın müddətə qədər “Dursunbəy Bələdiyyəspor”un “altyapı”sında çıxış etdiyini, amma atasının icazə verməməsi üzündən klubdan ayrılmaq məcburiyyətində qaldığını bildirib. Bu söhbəti eşidən kimi əsəbləşən Numa görüş bitəndən sonra tənbəllik etməyərək və Yasin Arasın ünvanını öyrənərək birbaşa onların evinə yollanıb! Həmin evdə Yasin Arasın atası Mustafa Arasla qarşılaşan Paskal ona hərəkətinin yanlış olduğunu başa salmağa çalışıb. “Çox böyük səhvə yol verirsiz. Oğlunuz böyük bir futbolsevərdi və artıq futbolun içindədi. Siz isə ona öz arzusunun dalınca getməyə icazə vermirsiz” deyən Numa Mustafa Arasa öz həyat hekayəsini danışıb. Fransa küçələrində böyüdüyünü və futbola məhəllədən başladığını deyən Numa peşəkar futbolda dövr edən böyük pullardan da danışıb. Futbolçuların qazandıqları pullardan örnəklər verən Numanın bu canfəşanlığı öz bəhrəsini verib. Belə ki, o, Mustafa Arası oğlunu futbola buraxmağa razı sala bilib. Məktəbdən evə gələn və heç nədən xəbəri olmayan Yasin Aras evdə Numanı görüncə, böyük sevinc yaşayıb. Ailə ilə birlikdə xatirə şəkli çəkdirən Numa daha sonra “Dursunbəy Bələdiyyəspor”un “altyapı”sını da ziyarət edib.

Qeyd edək ki, “Mançester Siti”nin və Almaniya yığmasının türkəsilli ulduzu İlkay Gündoğan əslən məhz elə bu zonadandı.