''Beşiktaş''ın əfsanəvi oyunçularından sayılan və yaxın keçmişdə ''Survivor'' yarışmasına da damğa vuranlardan biri olan Paskal Numa ilə bağlı qalmaqallı xəbər yayılıb.

Football-plus.az xəbər verir ki, zatən həmişə çılğın xarakteri ilə tanınan Numanın bu günlərdə bir ''Qalatasaray'' fanatını döydüyü məlum olub. Hadisə ''Aşkın saatı 19:03'' adlı filmin çəkilişində baş verib. Qeyd edək ki, bir babanın nəvəsinə aşılamaq istədiyi ''Beşiktaş'' sevgisindən bəhs edən film gələn ilin fevralında ekranlara çıxacaq. Filmdə Numa da epizodik olaraq rol alıb. Bir neçə gün öncə Sarıyer şəhərində baş tutan çəkilişlər zamanı bir nəfər Numaya yaxınlaşaraq şəkil çəkdirmək istəyib. Sabiq futbolçu həmin şəxsin istəyini geri çevirməyib. Ancaq bu an qalmaqal yaşanıb. ''Qalatasaray'' fanatı olduğu üzə çıxan həmin şəxs şəkil çəkdirərkən əli ilə ''4'' rəqəmini göstərib. Bu da ''Qalatasaray''ın formasındakı ulduzların sayıdı. Numa bunu görən kimi özündən çıxıb və həmin şəxsi yumruqlayaraq döyməyə başlayıb. Ətrafdakıların müdaxiləsinə rəğmən hirsi soyumayan Numa fanata daha bir neçə zərbə vurmağa macal tapıb. Barmağı qırılan həmin fanat Numadan polisə şikayət edib. Polislər isə ifadəsini almaq üçün sabiq ''Beşiktaş''lını bölməyə aparıblar.