“Aşkın olayım” mahnısı ilk dəfə “Beşiktaş”ın, sonra “Fənərbaxça”nın, ən sonda da “Qalatasaray”ın stadionunda səsləndi. İkardi qol vuranda o mahnını qoyurlar. Amma mahnı ilk populyarlığı “TikTok”da qazanmışdı. “Yutub”da son dönəmlərdə əsl trend oldu. Biz özümüz də buna təəccübləndik. İnanın ki, mən heç nə etməmişəm. Heç istəsəm də, pul versəydim belə mahnını bu qədər populyarlaşdıra bilməzdim. Buna gücüm çatmazdı. Birdən-birə “partladı”. Mənim üçün xoş bir hədiyyə oldu. Əvvəlki illərdə həmişə deyirdim ki, bu mahnının qədri bilinmədi. Ona layiqli dəyər verilmədi. Belə çıxır ki, yaxşı bir iş gördükdə illər keçdikdən sonra da onun qarşılığını almaq mümkündü.

İkardi məsələsinə də aydınlıq gətirmək istəyirəm. İnsanların düşüncə tərzinə görə mən bu mahnını məxsusi İkardi üçün yazmışam (gülür). Amma bu mahnını mən bəstələməmişəm. Mən müğənniyəm. Mahnım hər yerdə çalına, paylaşıla bilər. Etiraf edim ki, “Beşiktaş”lıyam. Amma iş elə gətirdi ki, mahnım ən çox “Qalatasaray”ın stadionunda İkardi ilə səslənməyə başladı. Bir andaca məşhurlaşdı. İkardini Türkiyəyə gələnə qədər, ümumiyyətlə, tanımırdım. Onun haqqında heç nə eşitməmişdim. Türkiyəyə gələndən bir müddət sonra sosial şəbəkədə məni təqibə aldı mahnımı paylaşdı. Bu addımının qarşılığında ona təşəkkür etmək üçün, həm də populyar sima olduğu üçün mən də onu təqibə aldım. Vəssalam. Hər şey yalnız bundan ibarətdi. Mənə heç mesaj da yazmayıb. Onunla indiyə qədər heç bir ünsiyyətim olmayıb. Sadəcə, bir dəfə mahnımı paylaşdı.

İnsanlar elə qəribə şeylər danışırlar ki... Bu insan evlidi və iki uşağı var. Məni də ən çox təəccübləndirən bu oldu ki, evli insanla necə münasibət qura biləcəyimi düşünüblər? Mənim evli insanla heç vaxt münasibətim ola bilməz”.