Bu gün "Qarabağ"la “Gent”i meydana şotlandiyalı Uilyam Kollam çağıracaq. 44 yaşlı referi bizlərə tanış simadı. Belə ki, indiyə kimi yığmanın üç, “Neftçi”nin bir oyununa təyinat alıb.

Football-plus.az xəbər verir ki, ilk dəfə DÇ-2010-un seçmə mərhələsində yığmanın səfərdə Finlandiya ilə görüşündə fit çalıb.

2008-ci il oktyabrın 11-də keçirilən oyunda meydan sahibləri penaltidən vurduqları yeganə qolla qələbə qazanıb. Yığma üzvlərindən Branimir Subaşiç, Saşa Yunisoğlu və Araz Abdullayevə sarı vərəqə göstərib. AÇ-2016-nın seçmə mərhələsinin oyunu üçün isə Bakıya gəlib. Yığmanın 2015-ci il oktyabrın 10-da BOS-da İtaliyaya 1:3 hesabıyla uduzduğu matçda Maksim Medvedevi “sarı”, Bədavi Hüseynovu “qırmızı” ilə cəzalandırılıb. Avropa Liqasının 2021/22 mövsümünün 3-cü təsnifat mərhələsinin “Neftçi” – HİK qarşılaşmasında da iş başında olub. 2021-ci il avqustun 3-də gerçəkləşən oyun 2:2 hesabı ilə yekunlaşıb. Xəyal Nəcəfov, Harramiz Suares və Fəhmin Muradbəyli sarı vərəqəyə ruş gəlib. Nəhayət, 2022-ci il sentyabrın 22-də yığmanın Millətlər Liqasının qrupunda Slovakiya ilə səfər görüşünü idarə edib. 2:1 hesabı ilə qalib gəldiyimiz matçda Şahruddin Məhəmmədəliyev, Riçard Almeyda və Amin Seydiyev “sarı” alıb.

2006-cı ildən FIFA referisi olan Kollam qitəmiqyaslı yarışlara müntəzəm təyinat alır. Onun bu vaxta kimi idarə etdiyi oyunlar arasında 2015-ci ildə UEFA Superkubokunun "Barselona" - "Sevilya" matçı, həmçinin Çempionlar Liqasının 2018/19 mövsümündə 5 qrup və 1/4 finalda "Tottenhem" - "Mançester Siti" qarşılaşması da var. Avropa Liqasının 2019/20 mövsümünün 1/8 finalında isə "İstanbul BŞ" - "Kopenhagen" matçında ədaləti qoruyub. Şotlandiyalının son 100 oyununun statistikasını da çıxardıq. Kollam 349 sarı, 22 qırmızı vərəqə göstərib, 31 dəfə isə penalti təyin edib.

ABDULLA İSMAYILOĞLU