Futbol üzrə ölkə çempionatının 1-ci liqasında 16-cı tura yekun vuruldu.

Rəqabət baxımından premyer-liqanı sözün əsl mənasında qabaqlayan turnirdə maraqlı nəticələr qeydə alındı. Maddi çətinliklər üzündə bataqlığı xatırladan “İrəvan”ın problemləri nəticədə əksini tapdı. Bundan sonra baş məşqçi Nazim Süleymanovun istefa xəbərini gözləsək də, olmadı. O, “14 minimi almadan gedən deyiləm” sözləriylə tura damğa vurdu. “İrəvan”ın iç üzünü ortaya qoyan nəticənin səbəbkarı MOİK oldu. Ordu klubu darmadağınla məğlubiyyətsizlik seriyasını üçə çatdırdı. “Şamaxı”nın “doğma divarlar” arasında “Zaqatala”nı yenə bilməməsi turun sürprizi oldu. “Şirlər”in büdrəməsi liderin dəyişməsiylə nəticələndisə, qonaqlar xal ehtiyatını yaxşılaşdırdı.
“Mingəçevir” – “Difai Ağsu” oyunu hər iki tərəfi qane edən hesabla bitdi. Həm meydan sahibləri, həm də qonaqlar xal ehtiyatını artırdı. Prinsipial əhəmiyyət daşıyan oyuna İmişlidə şahidlik etdik. Bölgənin eyni adlı təmsilçisi “Şamaxı”nın bir gün əvvəl xal itirməsindən xəbərdar idi. Ardıcıl dördüncü oyunda qələbə sevinən “İmişli” zirvəyə şərik olmaq imkanını əldən vermədi. Yəni “Karvan” da Əsgər Abdullayevin komandasına ilin ilk məğlubiyyətini yaşada bilmədi. Yevlaxlılar bununla da liderdən 5 xal geri düşdü. Turun son oyununda “Qaradağ Lökbatan” da səfərdə “Araz Saatlı”nı uda bildi. Bununla da zirvədə ikihakimiyyətlilik yarandı.

KƏNAN BAHADIR