Dünən futbol üzrə ölkə çempionatının 1-ci liqasında 16-cı tura start verildi. İlk oyunda MOİK “İrəvan”ı meydana çıxmağına peşman etdi. 22-ci dəqiqədə hesabı açan qonaqlar oyunboyu 7 cavabsız qol vurdu. Bu, Qərbi Azərbaycan təmsilçisinin dərin böhran yaşadığını bir daha sübut etdisə, MOİK-in növbəti sınaqlar üçün motivasiya mənbəyinə çevrildi.

İkinci oyunda gözlənilməz nəticə qeydə alındı. Görüşün aşkar favoriti olan “Şamaxı” “Zaqatala”nı evdə məğlub edə bilmədi. Qonaqların son dəqiqə qolu hərəyə bir xal qazandırdı. “Şirlər” ötən tur “Difai Ağsu”nun da müqavimətini qıra bilməmişdi. Ümumiyyətlə, liderin büdrəməsi bu gün meydana çıxacaq bir neçə komanda, xüsusən də “İmişli” ilə “Qaradağ Lökbatan” üçün şad xəbərdi. İşarə verdiyimiz görüşlərə keçid alaq.

Əvvəlcə “Mingəçevir” – “Difai Ağsu” matçını izləyəcəyik. “Nur şəhəri” təmsilçisi qələbəni autsayderlə oyunda axtaracaq. Turnir cədvəlinin, uyğun olaraq, 8-9-cu pillələrində qərarlaşanlar qarşılaşma ərzində eyni amal – xal ehtiyatını artırmaq uğrunda mübarizə aparacaq. İndiki vəziyyətdə meydan sahiblərinin favorit olduğunu demək mümkündü. Turun səbirsizliklə gözlənilən oyununda “İmişli” “Karvan”ı sınağa çəkəcək. Hər iki tərəf bu il, daha dəqiqi, son 3 turda məğlubiyyət dadmayıb. Matçın prinsipiallığını artıran ilk məqam budusa, ikincisi komandaların turnir cədvəlində qonşu olmasıdı. Əsgər Abdullayevin yetirmələri liderliyi ələ keçirmək üçün qalib gəlmək istəyəcək. Kənan Kərimovun yetirmələri isə ilk “dördlüy”yə yüksəlməyi hədəfləyir. Hər iki klubun çempionluq iddiasında olduğunu da qeyd edək. Tura “Araz Saatlı”nın “Qaradağ Lökbatan”ı qəbul edəcəyi oyunla yekun vurulacaq. Autsayderi “doğma divarlar” arasında çətin görüş gözləyir. Mövsüm ərzində cəmi bir qələbə qazanan komandanın ikinci dəfə bu uğuru təkrarlaması ehtimalı, demək olar ki, yoxdu. Qonaqlar isə lider olmağa yaxındı. Məhz bu matçda qələbə onları lider kürsüsünə əyləşdirə bilər.

28 fevral
İrəvan – MOİK 0:7
Elvin Valiiev, 22; 90+3. Sabir Allahquliyev, 27-p.; 63. Elmir Rəhimzadə, 66; 77; 90+2.

Şamaxı – Zaqatala 1:1
Səbayıl Bağırov, 13 - Nicat Oruclu, 90+4.

29 fevral
Mingəçevir – Difai Ağsu 1:1
Vidadi Cəfərov, 38 - İlham Allahverdiyev, 22.
Mingəçevir, Yaşar Məmmədzadə adına şəhər stadionu. Saat 15.00.

İmişli – Karvan 2:0
Gilyerme Silva, 55. Xəzər Mahmudov, 90+6.
İmişli, Heydər Əliyev adına şəhər stadionu. Saat 15.00.

Araz Saatlı – Qaradağ Lökbatan 0:2
Seyxan Fərəcov, 45+1, 59.
Saatlı, Olimpiya İdman Kompleksi. Saat 15.00.
Xal durumu: Qaradağ Lökbatan, İmişli - 32, Şamaxı - 30, MOİK – 29, Karvan – 27, İrəvan – 23, Zaqatala – 19, Mingəçevir – 14, Difai Ağsu – 8, Araz Saatlı – 4.
Bombardirlər: Elşad Tağıyev (Şamaxı) – 11, Emin Zamanov (Şamaxı) – 8.

KƏNAN BAHADIR