C qrupu
Napoli – Real 2:3 (1:2)
Napoli (Neapol, İtaliya): Meret, Di Lorentso, Estiqor, Natan, Olivera (Rui, 88), Lobotka (Kayuste, 88), Zambo-Angissa (Simeone, 88), Zelinski (Raspadori, 75), Politano (Elmas, 70), Kvaratsxeliya, Osimhen.
Real (Madrid, İspaniya): Kepa, Karvaxal, Rüdiger, Naço, Kamavinqa (Mendi, 64), Çuameni, Valverde, Kroos (Modriç, 64), Bellingem, Rodriqo (Xoselu, 75), Vinisius (Sebalyos, 84).
Qollar: Estiqor, 19 (1:0). Vinisius, 27 (1:1). Bellingem, 34 (1:2). Zelinski, 54-p. (2:2). Meret, 78-öz qapısına (2:3).
Vərəqələr: Kamavinqa, 29. Natan, 45. Bellingem, 70. Kepa, 89 – sarı.
Hakim: Kleman Turpen (Fransa)
3 oktyabr. Neapol. 51649 tamaşaçı.
oyunun statistikası
17 (7) qapıya (“çərçivə”yə) zərbə 18 (5)
9 künc zərbəsi 9
0 ofsayd 1
9 qayda pozuntusu 12
1 (0) sarı (qırmızı) vərəqə 3 (0)
49 topa sahibolma (faizlə) 51

"Football-plus.az" xəbər verir ki, ilk turu qələbə ilə başa vuran qrupun liderlərinin dueli ümidləri artıqlamasıyla doğrultdu. Hücum etməyi xoşlayan iki komandanın mübarizəsi ortaya baxımlı futbol çıxardı. “Kral klubu” üstünlüyə malik olsa da, hesabı neapollular açdı. Künc zərbəsindən sonra Kepa çıxışda səhvə yol verdi. Natanın ilk baş zərbəsi tirdən dönsə də, Estiqor Karvaxalı qabaqlayaraq topu tora göndərdi. Amma “Real”ın heyətində növbəti dəfə Bellingem səhnəyə çıxdı. Yeni transfer olunmasına baxmayaraq, sanki uzun illərdi “Real”da top qovan gənc ingiltərəli yarımmüdafiəçi əvvəlcə topu rəqibdən oğurlayaraq Vinisiusun fərqlənməsinə şərait yaratdı. Vinisius ÇL-də 16-cı qolunu vurmaqla “Real”ın heyətində bu turnirdə ən məhsuldar braziliyalı futbolçuların siyahısına başılıq edən Robreto Karlosa çatdı. Çox keçmədən Bellingem mükəmməl reyd edərək yolüstü bir neçə rəqibdən sıyrıldı və topu uzaq küncə göndərdi. Bellingem Kristian Karambe (1998) və Kriştiano Ronaldodan (2009) sonra “Real”ın heyətində ilk iki ÇL matçında qol vuran cəmi 3-cü futbolçu oldu. “Napoli” 2-ci hissədə olduqca şübhəli penalti sayəsində geri döndü. Amma son sözü yenə də qonaqlar söylədi. 78-ci dəqiqədə Valverdenin mükəmməl zərbəsi zamanı top əvvəlcə tirə, sonra da qapıçı Meretə dəyərək tora daxil oldu. Ona görə də qol avtoqol kimi qeydə alındı. İtaliya təmsilçisinə qarşı ardıcıl 9-cu (!) qələbəsini qazanan “Real” qrupda vahid liderliyi ələ keçirdi.

Union – Braqa 2:3 (2:1)
Union (Berlin, Almaniya): Rönnov, Yuranoviç, Duxi, Bonuççi, Leyte, Qosens (Russiyon, 86), Kral, Tuzar (Layduni, 63), Haberer (Aaronson, 81), Bekker, Berens (Folland, 63).
Braqa (Portuqaliya): Mateus, Mendes (Kaştro, 86), Niakate, Sərdar Saatçı, Borxa (Marin, 73), Əl Musrati, Salasar (Moutinyo, 73), Calo (Ruis, 83), Orta (Karvalyo, 83), Bruma, Banza.
Qollar: Bekker, 30 (1:0). Bekker, 37 (2:0). Niakate, 41 (2:1). Bruma, 51 (2:2). Kaştro, 90+4 (2:3).
Vərəqələr: Bonuççi, 13. Orta, 13. Banza, 46. Leyte, 54. Salasar, 72. Yuranoviç, 90+5 – sarı.
Hakim: Srcan Yovanoviç (Serbiya).
3 oktyabr. Berlin. 73445 tamaşaçı.
oyunun statistikası
12 (4) qapıya (“çərçivə”yə) zərbə 12 (6)
5 künc zərbəsi 5
9 ofsayd 1
12 qayda pozuntusu 10
3 (0) sarı (qırmızı) vərəqə 3 (0)
39 topa sahibolma (faizlə) 61

Tarixində ilk dəfə ÇL-də oynayan “Union” UEFA-nın qərarı ilə ev matçını öz meydanında yox, əzəli rəqib “Herta”nın stadionu sayılan “Olimpiaştadion”da keçirmək məcburiyyətində qalmışdı. 70 mindən çox azarkeş dəstəyinə malik olan berlinlilər üçün hər şey ideal başladı. Kapitan Bekker ilk yarının ortalarında dubl edərək yerli fanatlara böyük sevinc yaşatdı. Amma “Union” üçün sevincli anlar 37-ci dəqiqədən sonra başa çatdı. “Braqa” özündə güc taparaq mərkəz müdafiəçisi Niakate və vinger Brumanın qolları ilə artıq 51-ci dəqiqədə hesabı bərabərləşdirdi. Potuqaliya təmsilçisi psixoloji üstünlüyü ələ alsa da, uzun müddət başqa qol olmadı və hər şey bərabərliyə doğru gedirdi. Amma əzmkar “Braqa” 1 xalla kifayətlənməyərək son saniyələrdə qələbə qolunu da vurdu! 90+4-cü dəqiqəni artıq “Union” üçün lənətlənmiş saymaq lar. Çünki komanda ilk turda “Bernabeu” səfərində də məhz həmin dəqiqədə qol buraxaraq uduzdu! Bu, həm də paytaxt təmsilçisinin rəsmi matçlarda ardıcıl 6-cı məğlubiyyəti oldu.

1. Real 2 2 0 0 4-2 6
2. Napoli 2 1 0 1 4-4 3
3. Braqa 2 1 0 1 4-4 3
4. Union 2 0 0 2 2-4 0
24 oktyabr: Braqa – Real, Union – Napoli.

Oyundan sonra...
Rudi Qarsiya, “Napoli”nin baş məşqçisi: “Fikrimcə, heç-heçə daha ədalətli nəticə olardı. Amma futbol məhz belə oyundu. Çox güclü bir rəqiblə, demək olar, eyni səviyyyədə oynadıq. Səhv futbolun ayrılmaz hissəsidi. Ona görə də oyunçularımı günahlandırmaq istəmirəm. Onlar əllərindən gələni etdilər. Hesab 1:1 olduqdan sonra hücuma çox aludə olduq. Ona görə də müdafiəmizdə boşluqlar yaranmağa başladı. Bu dərəcədə hücuma atılmaq lazım deyildi. İkinci hissədə komandamın göstərdiyi reaksiya xoşuma gəldi. “Real” qələbə qolunu künc zərbəsindən sonra vurdu. Həmin künc zərbəsindən öncə “Real”ın oyunçusu qaydanı pozmuşdu. Amma hakimin fiti susdu. Ançelotti penaltiyə görə narazılıq edirsə, biz də bu epizoddan narazılıq edirik”.

Karlo Ançelotti, ''Real''ın baş məşqçisi: “Napoli”nin belə oynayacağını və bizə problem yaradacağını bilirdik. Çünki onların heyətində yüksək səviyyəli futbolçular heç də az deyil. Amma onları üstələməyi bacardıq. Yekun nəticənin ədalətli olduğunu düşünürəm. İlk yarıda Bellingem, Valverde və Rodriqo tez-tez mövqelərini deyişirdilər. Bu da “Napoli”yə problem yaradırdı. Bizə isə əlavə üstünlük verirdi. Qapımıza təyin olunan penaltinin yanlış olduğunu düşünürəm. Çünki top Naçonun özündən gələrək onun əlinə dəydi. Əli kəsib atmaq mümkün deyil. Qaydalara görə top oyunçunun öz bədənindən gələrək əlinə dəyirsə, penalti verilməməlidi”.

Urs Fişer, “Union”un baş məşqçisi: “Hər şey bizim üçün yaxşı başlamışdı. 2 top fərqi ilə öndəydik. Üstəlik “Braqa”nın hücumları təhlükəli alınmırdı. Amma həm fasilədən öncə, həm də fasilədən dərhal sonra qollar buraxdıq. 3-cü qolu biz vurmalıydıq. Çünki 3 gözəl fürsət yaxaladıq. Əvəzində bunu rəqib etdi. Bu qol psixoloji cəhətdən bizi öldürdü. Amma reallıq məhz belədi və onu qəbul etməliyik. Fanatlarımız mükəmməl olsa da, oyundan xalsız ayrılmaq məcburiyyətində qaldıq. Artıq digər hədəflərə köklənməliyik”.