Futbolçu Lionel Messi, tennisçi Novak Cokoviç və pilot Maks Ferstappen “Laureus World Sports Academy”nin versiyasına görə 2023-cü ilin ən yaxşı idmançısı adına namizədlərin siyahısına düşüb.

"Football-plus.az" xəbər verir ki, isveçli şüvüllətullanma ustası Arman Düplantis, amerikalı atlet Noa Layls və “Mançester Siti”nin norveçli hücumçusu Erlinq Holann da nominantlar sırasındadı. Qadınlar arasında bu mükafata “Barselona”nın oyunçusu Aytana Bonmati, dünyanın 1 nömrəli tennisçisi İqa Sventek, dağ xizəkçisi Mikaela Şiffrin, atletlər Şerika Cekson, Feyt Kipyeqon və Şa'Karri Riçardson iddialıdı.

Aprelin 22-də keçiriləcək mükafatlandırma mərasimində ilin ən yaxşı komandası da bəlli olacaq. Bu ada iddialılar sırasında qolf üzrə Avropa yığması, Almaniyanın kişilərdən ibarət basketbol yığması, “Mançester Siti”, “Red Bull” (Formula-1), CAR-ın reqbi yığması və İspaniyanın qadınlardan ibarət futbol yığması var.