Mövsümün ən önəmli və həlledici mərhələsinə qədəm qoymuşuq.

Artıq hər səhvin dəyəri artıb, bir uğursuzluq, bir məğlubiyyət həm turnir cədvəlində ciddi yerdəyişmələrə səbəb olur, həm da baş məşqçilərin taleyini müəyyənləşdirir. Doğma stadionda qonaq kimi oynayan “Qəbələ”nin baş məşqçisi Elmar Baxşıyev cari mövsümdə istafa verən məşqçilərin sayını 4-ə çatdırdı. Ədalət naminə “qırmızı-qaralar”ın “Kəpəz”lə qarşılaşmasında bəzi hakim qərarlarının mübahisəyə açıq olduğunu vurğulamalıyıq. Tarixdə isə hakim qərarları yox, nəticə qalır. Həmin nəticə onu diqtə edir ki, “Qəbələ” elitada qalmaq uğrunda mübarizədəki əsas rəqibi “Kəpəz”dən artıq 8 xal geridədi. Bazar günü “sükan arxasına” keçən Kaxabar Sxadadzenin kubokun son qalibini elitada necə saxlayacağı maraq doğurur.

Xal sıxlığını nəzərə alsaq, bəlkə də “Turan Tovuz” da, “Neftçi” də son heç-heçəni özü üçün qənimət sayır. Hərçənd belə yanaşma yetərincə mübahisəlidi. 2-ci yer uğrunda mübarizədə əsas rəqiblərindən “Sumqayıt”ın “Qarabağ”la oyunda xal itirməsinin real olduğunu anlayan “ağ-qaralar”, heç şübhəsiz, Tovuzda qələbəbə can atmalıydı. Amma bunu bacarmadılar. Bu 1 xal “Turan Tovuz”un iki pillə irəliləməsinə səbəb oldu. İndi Ayxan Abbasovun komandası şərti şəkildə ikinci “5-lik” adlandıra biləcəyimiz qrupun önündə qərarlaşıb.

Avrokuboklara vəsiqə uğrunda mübarizə aparan ilk “5-liy”in sonuncu komandası isə “Səbail”di. “Dənizçilər” fevralın 24-də 64 yaşını tamamlayan İqor Ponomaryovu iki cavabsız qolla “təbrik etdi”. Bu, “Sabah” üçün bəlkə də avrokuboklara vəsiqə uğrunda mübarizəni gərginləşdirmək baxımından son şans idi. Görünən odu ki, “tələbələr” yenidən Murad Musayev dönəmini xatırladan qeyri-sabitlik mərhələsinə qədəm qoyub.
Turdan ən qazanclı çıxan komandaların önündə isə “Zirə” gəlir. Əvvəlki 23 oyunda 14 qol vuran “qartallar” “Araz-Naxçıvan”ı darmadağın etdi. Çox güman, “Araz-Naxçıvan” mifi bu oyunla da bitdi. Artıq komandanın düşərgəsində əhval-ruhiyyənin pozulmasıyla bağlı xəbərlər gəlir ki, bu heç də xoş hal deyil.

Çox istərdim ki, “Qarabağ” – “Sumqayıt” oyunu haqda xüsusi təntənə ilə yazım. Axı meydanda çempionla 2-ci yerdə qərarlaşan komanda üz-üzə gəlird. Təəssüf: oyun göstərdi ki, “Qarabağ” hətta eksperimental heyətlə də rəqiblərindən çox üstündü. Qurban Qurbanovun komandasının artıq 3-cü dövrənin sonunda çempionluğu təmin etməsi şəxsən məni təəccübləndirməz. Bir başqa məqam da azarkeş sayı ilə bağlıdı. Cümə axşamı “Bəhramov”un tribunalarında iynə atsan, yerə düşməzdi. Amma bazar günü “Qarabağ”ın oyununu izləməyə cəmi 560 azarkeş gəlmişdi. Təbii ki, belədə oyuna köklənmək də, meydanda ən yaxşı keyfiyyətlərini göstərmək də çətin olur. “Qarabağ” belə münasibəti qətiyyən haqq etmir. Mənə elə gəlir ki, futbol ictimaiyyəti artıq azarkeşləri tribunalara cəlb etməyin yolları üzərində ciddidən də ciddi düşünməlidi.

Misli premyer-liqası
3-cü dövrə, 24-cü tur
23 fevral
Kəpəz – Qəbələ 2:1
24 fevral
Turan Tovuz – Neftçi 1:1
Səbail – Sabah 2:0
25 feval
Araz-Naxçıvan – Zirə 0:3
Qarabağ - Sumqayıt 2:0
1. Qarabağ 23 17 3 3 57-20 54
2. Sumqayıt 24 9 9 6 23-27 36
3. Neftçi 24 10 6 8 27-22 36
4. Zirə 24 9 8 7 17-13 35
5. Səbail 24 9 7 8 36-35 34
6. Turan Tovuz 24 8 7 9 37-34 31
7. Sabah 24 8 7 9 33-30 31
8. Araz-Naxçıvan 24 8 7 9 26-31 31
9. Kəpəz 24 6 5 13 22-41 23
10. Qəbələ 23 4 3 16 16-41 15
Bombardirlər: Olavio Juninyo (Qarabağ) – 15, Aleksandr Ramalinqom (Səbail) – 11, Orxan Əliyev (Araz-Naxçıvan), Yassin Benzya (Qarabağ) – 9.
Növbəti turun proqramı
1 mart, 19.00. Sumqayıt - Kəpəz
2 mart, 16.00. Zirə - Turan Tovuz
2 mart, 18.30. Sabah – Araz-Naxçıvan
3 mart, 16.00. Qəbələ - Səbail
3 mart, 19.00. Neftçi – Qarabağ

ORXAN