Detektiv əsər vurğunları, həyatın hər anında dramatizm axtaranlar üçün “Sabah”ın “Qarabağ” üzərində mümkün qələbəsi tam bir məlhəm ola bilərdi.
Tellur Mütəllimov 90+5-ci dəqiqədə möhtəşəm zərbə ilə “Sabah”ı irəli çıxaranda, yəqin ki, belələri əllərini bir-birinə sürtməyə başladı. Amma sadə bir həqiqəti – “tələbələr”in heyətində Yusif İmanovun varlığını unutmuşdular. Əminəm ki, Yusif hansısa həlledici, məsələn, titul uğrunda oyunun 90+8-ci dəqiqəsində belə faciəvi qol buraxsaydı, İqor Ponomaryov əlini ehtiyat oyunçular skamyasının divarına çırpacaqdı. Amma çırpmadı, “Sabah” isə 2 xaldan oldu və turnir cədvəlində üç pillə gerilədi.

Geriləməkdən söz düşmüşkən, cari mövsümün daha bir özəlliyi var: lider “Qarabağ”ı çıxsaq, qalan komandalar bir-birinə o qədər yaxın qərarlaşıb ki, istənilən qələbə ciddi tərəqqiyə, məğlubiyyət avromatik tənəzzülə səbəb olur. Məntiqlə “Neftçi” bu turdan ən çox qazanc götürən komanda olmalıydı. Axı “Zirə” ilə “Sumqayıt” qarşılaşırdı və birinin xal itirəcəyi aydın idi. Amma ikisi də 2 xal itirib, 1 xal qazandı, “Neftçi” həmin o 1 xala da həsrət qaldı. Özü də son 4 oyunda qələbəyə həsrət qalan “Araz-Naxçıvan”la oyunda. “Ağ-qaralar” meydanda yox idi və məğlubiyyətdən daha təsirli məqam budu. Baş məqçilər dəyişir, gəlib-gedir, ölkə futbolunun flaqmanı heç cür “uğur formulu”nu tapa bilmir. Uğurlu başlayan Miodraq Bojoviç də artıq sələflərinin yolu ilə gedir. Sadəcə, onu rumınlardan fərqləndirən bir cəhət var: uğursuzluğunu günahını başqalarında, odda, suda, havada yox, özündə görür. Ən azı buna görə monteneqroluya alqış düşür!

“Zirə” – “Sumqayıt” oyunu üzərində çox dayanmağa dəyməz. Şəxsən mənə elə gəldi ki, komandalar qələbə qazanmaqdan daha artıq dərəcədə meydandan xalla ayrılmağa həvəslidilər. Məhz bu hədəfə çatdıqlarına görə heç biri narazı qalmadı. Amma itirilən 2 xal sonda kiminsə yadına düşə bilər ki, bu artıq başqa söhbətin mövzusudu.

Turdan qazanclı çıxan komandalardan da danışmalıyıq. “Səbail” Qəbələyə sığınan “Kəpəz”i darmadağın etdi. 29-cu dəqiqədə hesabı açan gəncəlilər sonradan fərqi artırmaq əvəzinə elə kobud səhvlərə yol verdilər ki, bunların cəzası məhz 1:4 olmalıydı. Ancaq hər işdə bir xeyir var! Bəlkə də mövsümün indiki çağında bu məğlubiyyət gəncəlilərin işinə yarayacaq, onlar imkanlarını daha real qiymətləndirərək, turnir cədvəlində irəliləmək əvəzinə elitada yerini qorumaq üzərində dərindən düşünəcəklər.

Və “Turan Tovuz”... “Qəbələ” üzərindəki qələbə çox önəmli günlərə təsadüf etdi. Bir tərəfdən, fevralın 11-də “Huner Group”un klubu himayəyə götürməsinin bir ili tamam oldusa, digər tərəfdən, ölkəmizin avrokuboklardakı ilk təmsilçisi dünən 32 yaşını tamamladı. “Turan Tovuz” bu iki tarixi hadisə arasında qələbə qazandı. Düzdü, tovuzlular cəmi bir pillə irəliləyə bildi. Ancaq onların ümumi strategiyası aydındı: avrokuboklara vəsiqə qazana bilmiriksə, heç olmasa, elitada yerimizi vaxtında təmin edək və yeni mövsüm üçün komanda quruculuğuna başlayaq. Aydın, anlaşılan və praqmatik yanaşmadı!

Misli premyer-liqası
3-cü dövrə, 22-ci tur
11 fevral
Qarabağ – Sabah 3:3
12 fevral
Kəpəz – Səbail 1:4
13 fevral
Turan Tovuz – Qəbələ 2:1
Zirə - Sumqayıt 0:0
Araz-Naxçıvan – Neftçi 1:0
1. Qarabağ 22 16 3 3 55-20 51
2. Sumqayıt 22 9 8 5 23-25 35
3. Neftçi 22 9 5 8 25-21 32
4. Zirə 22 8 8 6 14-12 32
5. Səbail 22 8 6 8 32-33 30
6. Araz-Naxçıvan 22 8 6 8 24-26 30
7. Turan Tovuz 22 8 5 9 36-33 29
8. Sabah 22 6 6 8 30-26 28
9. Kəpəz 22 5 5 12 18-37 20
10. Qəbələ 22 4 3 15 15-39 15
Bombardirlər: Olavio Juninyo (Qarabağ) – 15, Aleksandr Ramalinqom (Səbail), Yassin Benzya (Qarabağ) – 8, Pedro Nuno (Səbail), Orxan Əliyev (Araz-Naxçıvan) – 7.
Növbəti turun proqramı
17 fevral, 16.00. Sabah – Kəpəz
17 fevral, 18.30. Səbail – Araz-Naxçıvan
18 fevral, 15.30. Sumqayıt - Turan Tovuz
18 fevral, 18.00. Neftçi - Zirə
28 fevral, 19.00. Qəbələ - Qarabağ

ORXAN