Elmar Baxşıyev fevralın 24-də “Qəbələ”nin baş məşqçi postundan istefa verdi. Bundan sonra “Sabah”ın mütəxəsislə əlaqə saxlayaraq xidmətində maraqlı olduğunu diqqətinizə çatdırmışdıq.

Mövzuyla bağlı daha bir məlumat əldə etmişik.
“Football-plus.az” xəbər verir ki, “Qarabağ” da məşqçinin təcrübəsindən yararlanmaq niyyətindədi. Fərq odu ki, Ağdam təmsilçisi onu akademiyasında işlə təmin etmək istəyir. Səbəb “köhlən atlar”ın bu sahə üzrə yeni inkişaf planı layihələrinin olmasıdı.

Son duruma görə, Baxşıyevin “Qarabağ-2”nin baş məşqçisi olmaq variantı daha realdı. Hələ ki bu vəzifəni Cavad Mirzəbəyli icra edir və komanda 33 xalla turnir cədvəlinin 4-cü sırasında qərarlaşıb. Gənclər lider “Neftçi-2”dən 25 xal geridədi.

Qeyd edək ki, daha öncə “Qəbələ”dən ayrılan Nail Kərimov “Qarabağ” akademiyasının meneceri təyin olunub.

KƏNAN BAHADIR