Tur Leverkuzendə start götürdü.
"Football-plus.az" xəbər verir ki, sürprizləri sevən və ötən mövsümün son turunda Dortmund “Borussiya”sına çempion olmağa imkan verməyən “Maynts-05” bu dəfə bundesliqanın liderini büdrədə bilmədi. Hərçənd kim bilir, bəlkə də qonaqların qapıçısı Sentnerin kobud səhvi olmasaydı, Leverkuzen təmsilçisi xal itirərdi. 2-ci hissənin ortalarında – hesab 1:1 olarkən 29 yaşlı bu qapıçı Andrixin zərbəsindən sonra düz üzərinə gələn topu qəribə şəkildə dəf edərək onun qapıya daxil olmasına mane ola bilmədi. “Bayer-04” bu kuryoz qolla rəsmi matçlarda qələbə seriyasını 5 oyuna, ən yaxın izləyicisi ilə xal fərqini bir günlük də olsa, 11-ə çatdırdı.
Şənbə günü keçirilən oyunlarda qonaqlar qələbəyə həsrət qaldı. “Haydenhaym”la bacara bilməyən “Union”un evdəki 4 oyunluq qələbə seriyası qırıldı. Yüksəlişdə olan “Verder” gözlənilmədən evdə autsayder “Darmştadt”ı məğlub edə bilmədisə, tarixinin ən yaxşı mövsümünü keçirən və tura “Bavariya”dan cəmi 4 xal geridə daxil olan “Ştutqart” fanatları önündə “Köln” ilə xalları yarı böldü. Münhenqladbax “Borussiya”sı 5 oyunluq qələbəsiz seriyaya “Bohum”a 5 qol vurmaqla son qoydu. Günün və turun əsas oyunu Münhendə keçirildi. “Leyptsiq” son 4 qarşılaşmada “Bavariya”ya uduzmamışdı (2 qələbə, 2 heç-heçə). “Rekordmayster”in yaxşı durumda olmadığını və son 3 rəsmi oyunda məğlub olduğunu nəzərə alsaq, “öküzlər”in bu dəfə də seriyanı davam etdirəcəyini düşünənlər az deyildi. Hər şey məhz buna doğru gedirdi. Qolsuz başa çatan ilk yarıdan sonra Keyn komandasını hesabda önə keçirsə də, bir-birinin ardınca yaxşı fürsətlər yaxalayan qonaqlar Şeşko ilə bərabərlik qolunu vurdular. 90-cı dəqiqədə artıq “Alyans Arena”da fit sədaları eşidilirdi. Çünki bu nəticə ilə zirvədə intriqa faktiki öləcəkdi. Amma əsas vaxta artırılan 1-ci dəqiqədə Keyn həm xilaskara, həm də qəhrəmana çevrildi. Məşhur forvard Çupo-Motinqin ötürməsindən sonra ilk qolda olduğu kimi, yenə sol ayağı ilə topu tora göndərdi. “Bavariya” bu çətin və vacib qələbə ilə xal fərqini yenidən 8-ə endirdi.
Bazar günü “Ayntraxt” “Volfsburq”la oyunda əsas bombardiri Marmuşun sayəsində məğlubiyyətdən qurtuldusa, “Auqsburq” “Frayburq”la görüşdə fasiləyə geridə yollanmasına baxmayaraq, əzmkar qələbə qazandı. Günün və turun əsas sürprizi Dortmundda qeydə alındı. Buna qədər 2024-cü ildə uduzmayan, ümumilikdə 10 oyunluq məğlubiyyətsiz seriyaya malik olan Dortmund “Borussiya”sı ortabab “Hoffenhaym”la bacara bilmədi. Bebu artıq 2-ci dəqiqədə qonaqları önə keçirsə də, “arılar” üstünlüyü ələ alaraq fasiləyə qədər 2 qol vurdu. Amma bu mövsüm “kəndçilər”in ən məhsuldar oyunçusu olan 21 yaşlı vinger Bayer 2-ci hissənin ortalarında 4 dəqiqə aralığında dubl edərək “Siqnal İduna Park”a toplaşanları şoka saldı. Liderlə xal fərqi 20-yə çatan “Borussiya” növbəti dəfə göstərdi ki, bu mövsüm yalnız ÇL-ə vəsiqə uğrunda mübarizə aparır.
23-cü tur
Bavariya – Leyptsiq 2:1
Keyn, 56; 90+1 – Şeşko, 70. (75000)
Bavariya: Noyer, Kimmix, Dayer, De Liqt, Gerreyro, Pavloviç (Kim Min Çje, 81), Qoretska, Sane (Tel, 65), Müller (Laymer, 65), Musiala (Çupo-Motinq, 84), Keyn.
Leyptsiq: Blasvix, Henrixs, Simakan, Orban, Raum (Lukeba, 90+2), Şlager, Aydara (Kampl, 74), Olmo, Simons (Elmas, 87), Şeşko (Baumqartner, 90+2), Openda (Poulsen, 73).
Bayer-04 – Maynts-05 2:1
Caka, 3. Andrix, 68 – Kor, 8. (30210)
Bayer-04: Qradetski, Frimponq (Tella, 83), Kossunu, Ta, Tapsoba, Qrimaldo, Andrix, Caka, Virts (Hlojek, 90), Y.Hofmann (Şik, 65), Adli (İnkapye, 83).
Borussiya D – Hoffenhaym 2:3
Malen, 21. N.Şlotterbek, 25 – Bebu, 2. Bayer, 61; 65. (81365)
Borussiya: Mayer, Ryuyerson (Hummels, 79), Əmrə Can, N.Şlotterbek, Maatsen (Adeyemi, 75), Zabitser, Brandt, Malen, Roys (Dyuranvill, 87), Sanço (Bayno-Gittens, 75), Füllkruq (Mukoko, 75).
Ştutqart – Köln 1:1
Miyo, 53 – Martel, 62. (54500)
Ştutqart: Bredlov, Vaqnoman, Ruo (Mittelştadt, 65), Anton, İto, Ştiller, Karazor (Mahmud Dahud, 67), Çon Vu Yon (Mvumpa, 37), Miyo (Levelinq, 86), Fürix, Girassi.
Auqsburq – Frayburq 2:1
Uduoxai, 72. Engels, 80 – Qrifo, 19-p. (30660)
Frayburq: Atubolu, Kübler (Ginter, 37), Höfler, Qulde, Günter (Makenqo, 66), Eqqeştayn, Röl (Sildilliya, 76), Doan, Qrifo (Vaysshaupt, 76), Höler, Qreqoritş (Şallai, 66).
Ayntraxt F – Volfsburq 2:2
Maks, 14. Marmuş, 90+2 – Lakrua, 2. Berens, 36. (58000)
Verder – Darmştadt 1:1
Tsimmermann, 8-öz qapısına – Yustvan, 33. (42100)
Borussiya M – Bohum 5:2
Nqumu, 28. Vayql, 35-p. Rayts, 72. Sibaço, 78. Onora, 76 – F.Hofmann, 75. K.Şlotterbek, 87. (53196)
Union – Haydenhaym 2:2
Qosens, 45+3. Şafer, 45+2 – Dovedan, 3. Beste, 71. (21341)
1. Bayer-04 23 19 4 0 59-16 61
2. Bavariya 23 17 2 4 63-26 53
3. Ştutqart 23 15 2 6 52-29 47
4. Borussiya D 23 11 8 4 46-30 41
5. Leyptsiq 23 12 4 7 49-30 40
6. Ayntraxt F 23 8 10 5 36-30 34
7. Hoffenhaym 23 8 6 9 41-43 30
8. Verder 23 8 6 9 32-35 30
9. Frayburq 23 8 5 10 30-42 29
10. Haydenhaym 23 7 7 9 33-40 28
11. Auqsburq 23 6 8 9 33-41 26
12. Borussiya M 23 6 7 10 41-45 25
13. Volfsburq 23 6 7 10 28-36 25
14. Union 23 7 4 12 23-37 25
15. Bohum 23 5 10 8 28-46 25
16. Köln 23 3 8 12 16-37 17
17. Maynts-05 23 2 9 12 18-37 15
18. Darmştadt 23 2 7 14 24-52 13
Bombardirlər: Keyn (Bavariya) – 27, Girassi (Ştutqart) – 18, Openda (Leyptsiq) – 16, Dəniz Undav (Ştutqart) – 14.
Növbəti turun oyunları martın 1-3-ü aralığında keçiriləcək: Frayburq – Bavariya, Maynts-05 – Borussiya M, Union – Borussiya D, Bohum – Leyptsiq, Hoffenhaym – Verder, Darmştadt – Auqsburq, Volfsburq – Ştutqart, Köln – Bayer-04, Haydenhaym – Ayntraxt F.
Turun rəqəmi
33 – tarixi mövsüm keçirən “Bayer-04” adını Almaniya futbolu tarixinə yazdırdı. Xabi Alonsonun məğlubedilməz armadası bu mövsüm keçirdiyi 33-cü rəsmi qarşılaşmada da məğlub olmadı (29 qələbə, 4 heç-heçə)! Buna qədər Almaniya futbolunda ardıcıl 33 rəsmi oyunda uduzmayan komanda olmamışdı. Əvvəlki rekord 2019 dekabr – 2020 sentyabr aralığında 32 rəsmi oyundan 31 qələbə, 1 heç-heçə ilə ayrılan Hans-Diter Flikin “Bavariya”sına məxsus idi.
Turun ulduzu
Harri Keyn (Bavariya) – İngiltərə yığmasının kapitanı növbəti dəfə səviyyəsini ortaya qoyaraq komandasının çempionluq ümidinin birdəfəlik məhv olmasına və xal fərqinin 10-a yüksəlməsinə imkan vermədi. “Leyptsiq”lə qarşılaşmada dubl edən Keyn Münhen nəhənginin heyətində 31-ci rəsmi oyunda vurduğu qolların sayını 31-ə çatdırdı! 30 yaşlı futbolçu bu mövsüm bundesliqada ev oyunlarındakı qollarının sayını 17-yə çatdırmaqla bu göstəricidə çempionat çərçivəsində şəxsi rekordunu təkrarladı. Keyn daha öncə 2016/17-də “Tottenhem”in heyətində premyer-liqada evdə 17 qol vurmuşdu.
Turun sitatı
Manuel Noyer, “Bavariya”nın kapitanı: “Təəssüf ki, Tuxellə birlikdə yaxşı bir şey inşa edə bilmədik. Məşqçilər korpusu üçün çox üzgünəm. Hamımız bir yerdə məsuliyyət daşıyırıq. Məktəbdə qiymətlərin pisdisə, o demək deyil ki, həmişə müəllim günahkardı. Tuxel top məşqçidi. Onun istefası klubun və burdakı futbolçuların imicinə heç də müsbət təsir göstərmir. Yaxşı və özünü sübut etmiş məşqçi ayrılırsa, bu həm də futbolçuların günahıdı”.