Ötən tur “Haydenhaym”la oyunda qələbə seriyası qırılan Dortmund “Borussiya”sı bunun acığını “Frayburq”u darmadağın etməklə çıxdı.

“Football-plus.az” xəbər verir ki, “arılar”ın cümə günü ilə bağlı inanılmaz seriyası davam edir. Belə ki, komanda cümə günü bundesliqada ev oyunlarında ardıcıl 36-cı qarşılaşmada məğlub olmadı (27 qələbə, 9 heç-heçə)! Cümə günü evdə son məğlubiyyət 2004-cü ilin yanvarın 30-da “Şalke-04”ə qarşı derbidə qeydə alınıb (0:1).

Şənbə günü nəinki Almaniyanın, eləcə də bütün Avropanın diqqəti Leverkuzenə yönəlmişdi. Tomas Tuxel nədənsə mövsümün ən vacib matçında heyətdə yeniliklər etmək qərarına gəlmişdi. “Bavariya” bu mövsüm ilk dəfə 3 mərkəz müdafiəçili sistemlə oynadı. Bundan başqa, ilk dəfə start heyətində meydana çıxan yeni transfer Boe karyerasında heç vaxt oynamadığı mövqedə, müdafiənin solunda qərarlaşmışdı. Bu addımlar özünü qətiyyən doğrultmadı. Əvvəldən sona qədər meydanda ağalıq edən Leverkuzen təmsilçisi güclü rəqibə sarsıdıcı məğlubiyyət yaşatdı. Maraqlıdı ki, darmadağının əsasını müqavilə ilə məhz “Bavariya”ya məxsus olan Stanişiç qoydu. Münhen nəhəngi 90 dəqiqə ərzində “çərçivə”yə yalnız bir zərbə endirdi və ən əsası bir qol vəziyyəti də yarada bilmədi! “Kikker” nəşrinin yazdığına görə, “rekordmayster” bundesliqada sonuncu dəfə 1995-in noyabrında “Hanza” ilə oyunu (0:0) qol vəziyyəti yaratmadan tamamlamışdı. Tuxelin kollektivi bu mövsüm artıq 2-ci dəfə darmadağın oldu. Komanda 14-cü turda Frankfurtda da bu aqibətlə üzləşmişdi (1:5). Superkompüterin versiyasına görə bu qələbədən sonra “Bayer-04”ün çempionluq şansı 66 faizə yüksəldi!

Bu tur həm elitada, həm də 2-ci bundesliqada bir çox qarşılaşmalarda fanatlar meydana tennis topları atmaqla ölkə futboluna xarici investorların gəlişinə etiraz etdilər. Bu üzdən bəzi oyunların gedişində fasilələr yarandı. Məhz bu səbəbə görə “Union” “Volfsburq”la görüşdə qələbə qolunu ilk yarıya əlavə olunmuş 25-ci (!) dəqiqədə vurdu. Məşqçi dəyişikliyindən sonra yavaş-yavaş özünə gələn paytaxt təmsilçisi evdə ardıcıl 4-cü qələbəsini qazanmaqla elitada şəxsi rekordunu təkrarladı. “Canavarlar”ın isə 2024-də hələ də qələbəsi yoxdu. Cari təqvim ilinə uğursuz başlayan “Leyptsiq” “Auqsburq” səfərində 1 xalla kifayətləndi. Aşkar autsayder “Darmştadt” Münhenqladbaxda xal qazansa da, komandanın qələbəsiz seriyası 14 oyuna yüksəldi. Son 5 turda uduzmayan “Verder”in bu seriyası gözlənilmədən “Haydenhaym”la ev oyununda qırıldı. 3-cü pillədən möhkəm yapışan “Ştutqart” isə “Maynts-05”ə heç bir şans vermədi. Həm şvabiyalıların qələbə, həm də Dəniz Undavın qol seriyası 3 oyuna çatdı.

21-ci tur
Bayer-04 – Bavariya 3:0
Stanişiç, 18. Qrimaldo, 50. Frimponq, 90. (30210)
Bayer-04: Qradetski, Stanişiç, Tapsoba, Ta, İnkapye, Qrimaldo (Puerta, 90), Andrix, Caka, Tella (Frimponq, 65), Virts (Hlojek, 90), Adli (Hofmann, 82).
Bavariya: Noyer, Boe (Gerreyro, 81), Upamekano (Kimmix, 60), Dayer, Kim Min Çje, Mazraui, Pavloviç (Müller, 60), Sane, Qoretska (Tel, 71), Musiala, Keyn.
Borussiya D – Frayburq 3:0
Malen, 16; 45+7. Füllkruq, 87. (81365)
Borussiya: Kobel, Ryuyerson (Volf, 79), Zyule, Şlotterbek, Maatsen (Morey, 88), Zabitser, Əmrə Can (Hummels, 88), Roys (Sanço, 88), Bayno-Gittens (Brandt, 66), Malen, Füllkruq.
Frayburq: Atubolu, Kübler, Qulde (Salai, 23), Sildilliya, Makenqo (Günter, 79), Eqqeştayn, Höfler, Şallai (Filipp, 80), Qrifo (Vaysshaupt, 59), Höler, Qreqoritş (Doan, 59).
Auqsburq – Leyptsiq 2:2
Tits, 35. Demiroviç, 60 – Openda, 39. Şeşko, 52. (30000)
Leyptsiq: Qulaçi, Henrixs, Orban (Simakan, 68), Klostermann, Raum, Şlager, Kampl (Zayvald, 68), Olmo (Elmas, 67), Simons (Baumqartner, 84), Şeşko (Poulsen, 72), Openda.
Ayntraxt F – Bohum 1:1
Marmuş, 14 – Broşinski, 17. (57500)
Ayntraxt: Qral, Buta, Kox, Paço, Maks (Baum, 84), Skiri, Götse, Knauff (Bahoya, 84), Çaibi, Larsson (Van De Beek, 21), Marmuş (Ekitike, 64).
Ştutqart – Maynts-05 3:1
Mittelştadt, 45+2. Levelinq, 45+1. Dəniz Undav, 73 – Ajork, 76. (52500)
Hoffenhaym – Köln 1:1
Kramariç, 90+4 – Finkqrafe, 79. (23020)
Union – Volfsburq 1:0
Duxi, 45+25. (22012)
Verder – Haydenhaym 1:2
Şmid, 19 – Melouni, 12. Beste, 18. (41000)
Borussiya M – Darmştadt 0:0
(42000)
1. Bayer-04 21 17 4 0 55-14 55
2. Bavariya 21 16 2 3 59-22 50
3. Ştutqart 21 14 1 6 49-27 43
4. Borussiya D 21 11 7 3 43-26 40
5. Leyptsiq 21 11 4 6 46-28 37
6. Ayntraxt F 21 8 8 5 31-25 32
7. Frayburq 21 8 4 9 26-37 28
8. Hoffenhaym 21 7 6 8 38-40 27
9. Haydenhaym 21 7 6 8 30-36 27
10. Verder 21 7 5 9 30-34 26
11. Auqsburq 21 5 8 8 31-39 23
12. Volfsburq 21 6 5 10 25-33 23
13. Borussiya M 21 5 7 9 36-41 22
14. Bohum 21 4 10 7 23-39 22
15. Union 21 6 3 12 20-35 21
16. Köln 21 3 7 11 15-35 16
17. Maynts-05 21 1 9 11 16-35 12
18. Darmştadt 21 2 6 13 22-49 12
Bombardirlər: Keyn (Bavariya) – 24, Girassi (Ştutqart) – 17, Openda (Leyptsiq) – 15, Dəniz Undav (Ştutqart) – 14.
Növbəti turun oyunları fevralın 16-18-i aralığında keçiriləcək: Bohum – Bavariya, Volfsburq – Borussiya D, Hoffenhaym – Union, Haydenhaym – Bayer-04, Frayburq – Ayntraxt F, Leyptsiq – Borussiya M, Köln – Verder, Maynts-05 – Auqsburq, Darmştadt – Ştutqart.

Turun rəqəmi
31 – “Bavariya”nı darmadağın edən “Bayer-04” bu mövsüm keçirdiyi 31-ci rəsmi oyunda da uduzmadı (27 qələbə, 4 heç-heçə). İndi leverkuzenliləri rekordun təkrarlanmasından cəmi bir oyun ayırır. Bundesliqa klubları arasında ən uzun məğlubiyyətsiz seriya ilə bağlı rekord “Bavariya”ya məxsusdu. Münhen nəhəngi 2019-20-ci illərdə Hans-Diter Flikin başçılığı altında ardıcıl 32 rəsmi oyunda uduzmamışdı. “Bayer-04” növbəti həftə son 8 turda uduzmayan debütant “Haydenhaym”ın qonağı olacaq.

Turun ulduzu
Niklas Füllkruq (Borussiya D) – 31 yaşlı forvard bu təqvim ilinə əla başlayıb. Ötən ev oyununda het-trik edən Füllkruq bu dəfə ev matçında 1 qol, 2 məhsuldar ötürməlik performans sərgilədi. Təcrübəli futbolçu ilk dövrədə 14 oyuna 5 dəfə fərqlənmişdisə, 2024-cü ildə ona eyni sayda qol vurmaq üçün cəmi 5 oyun kifayət edib. Yeri gəlmişkən, fevralın 9-da Füllkruqun doğum günü idi. O, müvafiq statistikanın aparılmağa başlandığı 2004-cü ildən bəri bundesliqada doğum günündə 3 qolda iştirak edən ilk futbolçu oldu!

Turun sitatı
Tomas Müller, “Bavariya”nın forvardı: “Təəssüf ki, oyunumuzda heç də xoş simptomlar yoxdu. Oliver Kan demişkən, meydanda bizimkilərin “yumurtalarını” görmədim! Çox əsəbiyəm. Bütün günahı baş məşqçinin üstünə atmaq düzgün deyil. Əslində məşqlərdə yaxşı təsir bağışlayırıq. Oyun vaxtı təzyiqin olması normaldı. Amma bunun öhdəsindən gəlmək lazımdı. Bizim oyunumuzda enerji və sərbəstlik çatışmır. Biz sanki A-dan B-yə, sonra da B-dən V-yə oynayırıq. Heç kim risk etmək sərbəstliyinə malik deyil. “Bayer-04”də də bəzən işlər qaydasında getmir. Amma onlar çıxış yolu tapırlar və daha yaradıcı oynayırlar”.